ᱥᱟᱱᱛᱟᱲᱤ ᱞᱟᱹᱜᱤᱫ ᱱᱮᱥᱟᱜ ᱡᱩᱣᱟᱹᱱ ᱥᱟᱶᱦᱮᱫ ᱮᱠᱟᱰᱮᱢᱤ ᱥᱤᱨᱯᱷᱟᱹ ᱫᱚᱭ ᱧᱟᱢ ᱮᱫᱟ ᱡᱷᱟᱲᱠᱷᱚᱸᱰ ᱨᱮᱭᱟᱜ ᱡᱟᱢᱥᱮᱫᱽᱯᱩᱨ ᱥᱩᱨ ᱵᱟᱨᱤᱜᱳᱰᱟ ᱟᱹᱛᱩ ᱨᱮᱱ ᱥᱟᱞᱜᱮ ᱦᱟᱸᱥᱫᱟᱜ᱾
ᱩᱱᱤ ᱫᱚ ᱟᱡᱟᱜ "ᱡᱟᱱᱟᱢ ᱫᱤᱥᱚᱢ ᱩᱡᱟᱹᱲᱚᱜ ᱠᱟᱱᱟ" ᱜᱟᱢᱟᱢ ᱞᱟᱹᱜᱤᱫ ᱱᱚᱣᱟ ᱥᱤᱨᱯᱷᱟᱹ ᱮ ᱧᱟᱢ ᱮᱫᱟ᱾ ᱜᱟᱢᱟᱢ ᱨᱮ ᱩᱱᱤ ᱫᱚ ᱟᱡᱟᱜ ᱟᱰᱮ ᱯᱟᱥᱮ ᱨᱮ ᱜᱷᱚᱴᱟᱜ ᱠᱟᱱ ᱪᱤᱛᱟᱹᱨ ᱠᱚᱜᱮᱭ ᱥᱟᱵ ᱨᱟᱠᱟᱵ ᱟᱠᱟᱫᱟ᱾ ᱪᱮᱫ ᱞᱮᱠᱟ ᱚᱱᱟ ᱴᱚᱴᱷᱟ ᱨᱮᱱ ᱦᱚᱲ ᱚᱠᱚᱣᱟᱜ ᱦᱟᱥᱟ ᱡᱟᱭᱜᱟ ᱠᱚ ᱨᱮᱡ ᱚᱪᱚᱜ ᱠᱟᱱᱟ, ᱪᱮᱫ ᱞᱮᱠᱟ ᱱᱟᱣᱟ ᱱᱟᱣᱟ ᱠᱚᱞᱠᱟᱨᱠᱷᱟᱱᱟ ᱵᱮᱱᱟᱣᱚᱜ ᱠᱟᱱ ᱛᱮ ᱟᱹᱛᱩ ᱫᱤᱥᱚᱢ ᱨᱮ ᱚᱱᱟ ᱨᱮᱭᱟᱜ ᱵᱟᱹᱲᱤᱡ ᱚᱨᱥᱚᱝ ᱧᱮᱞᱚᱜ ᱠᱟᱱᱟ᱾
ᱥᱤᱨᱯᱷᱟᱹ ᱞᱮᱠᱟᱛᱮ, ᱛᱟᱸᱢᱵᱟ ᱨᱮᱭᱟᱜ ᱥᱤᱫ ᱥᱟᱱᱟᱢ ᱟᱨ ᱕᱐ ᱦᱟᱡᱟᱨ ᱴᱟᱠᱟ ᱢᱤᱫ ᱢᱤᱫ ᱥᱤᱨᱯᱷᱟᱹ ᱪᱟᱞ ᱟᱠᱷᱲᱟ ᱨᱮᱠᱚ ᱪᱟᱞ ᱟᱭᱟ᱾
ᱥᱟᱞᱜᱮ ᱫᱚ ᱒᱓ ᱚᱠᱴᱚᱵᱚᱨ ᱑᱙᱘᱙ ᱥᱮᱨᱢᱟ ᱨᱮ ᱡᱷᱟᱲᱠᱷᱚᱸᱰ ᱨᱮᱭᱟᱜ ᱵᱟᱨᱤᱜᱳᱰᱟ ᱟᱹᱛᱩ ᱨᱮᱭ ᱡᱟᱱᱟᱢ ᱞᱮᱱᱟ᱾ ᱟᱯᱟᱛ ᱫᱚ ᱵᱚᱸᱜᱟ ᱛᱟᱞᱟ ᱜᱟᱞᱩᱨᱟᱢ ᱦᱟᱸᱥᱫᱟᱜ ᱟᱨ ᱟᱭᱳ ᱫᱚ ᱥᱤᱛᱟ ᱦᱟᱸᱥᱫᱟᱜ᱾
ᱟᱡᱟᱜ ᱮᱛᱚᱦᱚᱵ ᱥᱮᱪᱮᱫ ᱫᱚ ᱵᱟᱨᱤᱜᱳᱰᱟ ᱥᱠᱩᱞ ᱠᱷᱚᱱ ᱦᱩᱭ ᱟᱠᱟᱱᱟ᱾ ᱚᱱᱟ ᱛᱟᱭᱚᱢ ᱜᱳᱵᱤᱱᱫᱚᱯᱩᱨ ᱨᱟᱡᱮᱫᱽᱨᱚ ᱠᱚᱞᱮᱡᱽ ᱠᱷᱚᱱ ᱤᱱᱴᱟᱨ, ᱠᱚᱨᱚᱱᱰᱤᱦ ᱨᱮᱭᱟᱜ ᱮᱞ.ᱵᱤ.ᱮᱥ.ᱮᱢ ᱠᱚᱞᱮᱡᱽ ᱠᱷᱚᱱ ᱵᱤ.ᱮ. ᱟᱨ ᱠᱳᱞᱦᱟᱱ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮᱭᱟᱜ ᱜᱷᱟᱴᱥᱤᱞᱟᱹ ᱠᱚᱞᱮᱡᱽ ᱠᱷᱚᱱ ᱥᱟᱱᱛᱟᱲᱤ ᱯᱟᱹᱨᱥᱤ ᱛᱮ ᱯᱤ.ᱡᱤ. ᱮ ᱯᱟᱥ ᱟᱠᱟᱫᱟ᱾
 |
| ᱡᱟᱱᱟᱢ ᱫᱤᱥᱚᱢ ᱩᱡᱟᱹᱲᱚᱜ ᱠᱟᱱᱟ |
ᱥᱟᱞᱜᱮ ᱟᱜ ᱠᱟᱛᱷᱟ ᱞᱮᱠᱟᱛᱮ ᱒᱐᱑᱕-᱑᱖ ᱠᱷᱚᱱ ᱩᱱᱤ ᱚᱱᱚᱬᱦᱮᱸ ᱚᱞ ᱮ ᱮᱦᱚᱵ ᱟᱠᱟᱫᱟ᱾ "ᱡᱟᱱᱟᱢ ᱫᱤᱥᱚᱢ ᱩᱡᱟᱹᱲᱚᱜ ᱠᱟᱱᱟ" ᱱᱚᱣᱟ ᱜᱟᱢᱟᱢ ᱫᱚ ᱒᱐᱑᱘ ᱠᱷᱚᱱ ᱚᱞ ᱮ ᱮᱦᱚᱵ ᱟᱠᱟᱫᱟ᱾ ᱒᱐᱒᱑ ᱨᱮ ᱯᱚᱫᱽᱢᱚ ᱥᱨᱤ ᱫᱚᱢᱚᱭᱚᱱᱛᱤ ᱵᱮᱥᱨᱟ ᱵᱟᱹᱲᱯᱟᱫᱟ ᱨᱮ ᱱᱚᱣᱟᱭ ᱩᱰᱷᱟᱹᱣ ᱥᱟᱹᱜᱩᱱ ᱞᱮᱫᱟ᱾
ᱱᱤᱛ ᱥᱟᱞᱜᱮ ᱦᱟᱸᱥᱫᱟᱜ ᱫᱚ ᱪᱟᱹᱠᱩᱞᱤᱭᱟᱹ ᱨᱮᱭᱟᱜ ᱮᱥ.ᱟᱨ.ᱮᱢ ᱰᱤᱜᱽᱨᱤ ᱠᱚᱞᱮᱡᱽ ᱨᱮ ᱢᱤᱫ ᱜᱚᱲᱚ ᱯᱨᱚᱯᱷᱮᱥᱟᱨ ᱞᱮᱠᱟᱛᱮᱭ ᱠᱟᱹᱢᱤ ᱠᱟᱱᱟ᱾ ᱩᱱᱤ ᱫᱚ ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱥᱟᱶᱛᱟ ᱨᱮᱱ ᱜᱚᱲᱚ ᱥᱩᱛᱨᱮᱛ ᱦᱚᱸ ᱠᱟᱱᱟᱭ᱾
0 Comments