 |
| ᱫᱤᱜᱟᱢᱵᱚᱨ ᱦᱟᱸᱥᱫᱟ |
ᱥᱮᱪᱮᱫ
ᱩᱱᱤ ᱫᱚ ᱟᱡᱟᱜ ᱮᱛᱚᱦᱚᱵ ᱥᱮᱪᱮᱫ ᱨᱟᱡᱽᱫᱳᱦᱟ ᱢᱤᱰᱤᱞ ᱥᱠᱩᱞ ᱟᱨ ᱢᱟᱱᱯᱩᱨ ᱦᱟᱭ ᱥᱠᱩᱞ ᱠᱷᱚᱱ ᱮ ᱯᱩᱨᱟᱹᱣ ᱟᱠᱟᱫᱟ᱾ ᱟᱨ ᱱᱚᱸᱰᱮ ᱠᱷᱚᱱ ᱜᱮ ᱑᱙᱕᱗ ᱥᱮᱨᱢᱟ ᱨᱮ ᱢᱮᱴᱨᱤᱠ ᱮ ᱯᱟᱥ ᱟᱠᱟᱫᱟ᱾ ᱚᱱᱟ ᱛᱟᱭᱚᱢ ᱵᱤᱦᱟᱨ ᱡᱮᱜᱮᱛ ᱵᱤᱨᱫᱟᱹᱜᱟᱲ (ᱱᱤᱛ ᱨᱟᱺᱪᱤ ᱡᱮᱜᱮᱛ ᱵᱤᱨᱫᱟᱹᱜᱟᱲ) ᱨᱮᱭᱟᱜ ᱪᱟᱸᱭᱵᱟᱥᱟ ᱴᱟᱴᱟ ᱠᱚᱞᱮᱡᱽ ᱠᱷᱚᱱ ᱑᱙᱖᱓ ᱥᱮᱨᱢᱟ ᱨᱮ ᱨᱟᱡᱽᱟᱹᱨᱤ ᱥᱟᱬᱮᱥ ᱥᱟᱛᱟᱢ ᱪᱮᱛᱟᱱ ᱵᱤ.ᱮ. ᱯᱟᱥ ᱠᱮᱫᱟ᱾ ᱟᱨ ᱚᱱᱟ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱠᱷᱚᱱ ᱜᱮ ᱑᱙᱖᱕ ᱥᱮᱨᱢᱟ ᱨᱮ ᱨᱟᱡᱽᱟᱹᱨᱤ ᱥᱟᱬᱮᱥ ᱥᱟᱛᱟᱢ ᱪᱮᱛᱟᱱ ᱮᱢ.ᱮ. ᱰᱤᱜᱽᱨᱤ ᱮ ᱦᱟᱢᱮᱴ ᱞᱮᱫᱟ᱾
ᱠᱟᱹᱢᱤ ᱡᱤᱭᱚᱱ
ᱫᱤᱜᱟᱢᱵᱚᱨ ᱦᱟᱸᱥᱫᱟ ᱫᱚ ᱟᱡᱟᱜ ᱠᱟᱹᱢᱤ ᱡᱤᱭᱚᱱ ᱴᱤᱥᱠᱳ ᱟᱹᱫᱤᱵᱟᱹᱥᱤ ᱠᱳᱼᱚᱯᱟᱨᱮᱴᱤᱵᱷ ᱥᱳᱥᱟᱭᱴᱤ ᱠᱷᱚᱱ ᱮ ᱮᱦᱚᱵ ᱞᱮᱫᱟ᱾ ᱱᱚᱣᱟ ᱥᱟᱶᱛᱟ ᱫᱚ ᱴᱚᱴᱷᱟ ᱨᱮᱱ ᱟᱹᱫᱤᱵᱟᱹᱥᱤ ᱠᱟᱹᱢᱤ ᱧᱟᱢ ᱵᱟᱠᱷᱲᱟ ᱛᱮᱭ ᱠᱟᱹᱢᱤ ᱠᱟᱱ ᱛᱟᱦᱮᱸᱫ᱾ ᱛᱟᱭᱚᱢ ᱛᱮ ᱵᱷᱟᱨᱚᱛ ᱥᱮᱵᱟᱥᱨᱚᱢ ᱥᱚᱝᱜᱷᱚ ᱨᱮᱭ ᱠᱟᱹᱢᱤ ᱠᱟᱱ ᱛᱟᱦᱮᱸᱫ᱾
ᱡᱟᱢᱥᱮᱫᱽᱯᱩᱨ ᱨᱮᱱᱟᱜ ᱠᱚᱨᱚᱱᱰᱤᱦ ᱨᱮᱭᱟᱜ ᱞᱟᱞ ᱵᱟᱡᱟᱫᱩᱨ ᱥᱟᱥᱛᱨᱤ ᱠᱚᱞᱮᱡᱽ ᱨᱮ ᱯᱨᱚᱯᱷᱮᱥᱟᱨ ᱞᱮᱠᱟᱛᱮ ᱦᱚᱸᱭ ᱠᱟᱹᱢᱤ ᱟᱠᱟᱫᱟ᱾ ᱢᱩᱪᱟᱹᱫ ᱨᱮ ᱠᱚᱞᱮᱡᱽ ᱨᱮᱱ ᱯᱨᱤᱱᱥᱤᱯᱟᱞ ᱞᱮᱠᱟ ᱛᱮᱜᱮ ᱠᱟᱹᱢᱤ ᱠᱷᱚᱱ ᱮ ᱡᱤᱨᱟᱹᱣ ᱞᱮᱱᱟ᱾
ᱥᱟᱶᱦᱮᱫ ᱪᱟᱨᱪᱟ
ᱵᱟᱲᱟᱭ ᱟᱠᱟᱱᱟ, ᱯᱟᱹᱴᱷᱣᱟᱹ ᱡᱤᱭᱚᱱ ᱠᱷᱚᱱ ᱜᱮ ᱟᱡᱟᱜ ᱥᱟᱶᱦᱮᱫ ᱪᱮᱛᱟᱱ ᱫᱩᱞᱟᱹᱲ ᱛᱟᱦᱮ ᱠᱟᱱᱟ᱾ ᱥᱟᱱᱛᱟᱲᱤ ᱟᱨ ᱦᱤᱱᱫᱤ ᱵᱟᱱᱟᱨ ᱯᱟᱹᱨᱥᱤ ᱛᱮᱜᱮᱭ ᱚᱞᱮᱫ ᱛᱟᱦᱮᱸᱫ᱾ ᱪᱟᱸᱭᱵᱟᱥᱟ ᱴᱟᱴᱟ ᱠᱚᱞᱮᱡᱽ ᱠᱷᱚᱱ ᱥᱟᱱᱛᱟᱲ ᱯᱟᱹᱴᱷᱣᱟᱹ ᱠᱚ ᱡᱟᱦᱟ ᱟᱦᱞᱟ ᱧᱩᱛᱩᱢᱟᱱ ᱯᱟᱛᱷᱟᱢ ᱠᱚ ᱪᱷᱟᱯᱟᱭᱮᱫ ᱛᱟᱦᱮᱸᱫ ᱚᱱᱟ ᱨᱮᱱ ᱥᱟᱥᱟᱯᱲᱟᱣᱤᱡ ᱮ ᱛᱟᱦᱮᱸ ᱠᱟᱱᱟ᱾ ᱩᱱᱤ ᱫᱚ ᱥᱟᱱᱛᱟᱲᱤ ᱥᱟᱶᱦᱮᱫ ᱦᱟᱨᱟᱼᱵᱩᱨᱩ ᱞᱟᱹᱜᱤᱫ ᱞᱮᱛᱟᱲ ᱜᱮ ᱯᱳᱴᱠᱟ ᱟᱨ ᱜᱷᱟᱴᱥᱤᱞᱟᱹ ᱥᱩᱨ ᱠᱚᱨᱮᱱᱟᱜ ᱟᱹᱛᱩ ᱠᱚᱨᱮ ᱪᱟᱞᱟᱣ ᱠᱟᱛᱮ ᱦᱚᱲ ᱠᱟᱹᱦᱱᱤ ᱟᱨ ᱦᱚᱲ ᱥᱮᱨᱮᱧ ᱠᱚ ᱛᱩᱢᱟᱹᱞ ᱠᱟᱛᱮ ᱦᱚᱲ ᱠᱚ ᱥᱟᱶᱦᱮᱫ ᱵᱟᱵᱚᱛ ᱛᱮᱭ ᱪᱮᱸᱜᱷᱟᱣᱼᱮᱫ ᱠᱚ ᱛᱟᱦᱮᱸᱫ᱾
ᱛᱟᱞᱢᱟ ᱥᱚᱨᱠᱟᱨᱟᱜ ᱟᱹᱫᱤᱵᱟᱹᱥᱤ ᱩᱛᱱᱟᱹᱣ ᱛᱷᱟᱹᱯᱱᱤᱛ (Tribal Research Institute) ᱨᱮᱱ ᱥᱚᱸᱦᱮᱫ ᱞᱮᱠᱟᱛᱮ ᱩᱱᱤ ᱫᱚ ᱟᱭᱢᱟ ᱯᱚᱲᱦᱚᱱ ᱯᱩᱛᱷᱤ ᱠᱚ ᱫᱮᱵᱽᱱᱟᱜᱽᱨᱤ ᱠᱷᱚᱱ ᱥᱟᱱᱛᱟᱲᱤ ᱛᱮᱭ ᱛᱚᱨᱡᱚᱢᱟ ᱟᱠᱟᱫᱟ᱾ ᱩᱱᱤ ᱫᱚ ᱵᱷᱟᱨᱚᱛ ᱨᱮᱭᱟᱜ ᱥᱚᱝᱵᱤᱫᱷᱟᱱ ᱥᱟᱱᱛᱟᱲᱤ ᱛᱮ ᱦᱚᱸᱭ ᱛᱚᱨᱡᱟᱢᱟ ᱟᱠᱟᱫᱟ᱾
ᱟᱡᱟᱜ ᱚᱞ ᱯᱚᱛᱚᱵ ᱠᱚ
᱑) "ᱥᱟᱨᱱᱟ"
᱒) "ᱜᱚᱫᱽᱭᱚ ᱯᱚᱫᱽᱭᱚ ᱥᱚᱝᱜᱽᱨᱚᱦᱚ"
᱓) "ᱥᱟᱱᱛᱟᱞᱤ ᱞᱳᱠ ᱠᱟᱛᱷᱟ ᱠᱤ ᱥᱚᱝᱜᱽᱨᱚᱦᱚ"
᱔) "ᱥᱟᱱᱛᱟᱞᱤ ᱦᱚᱲ ᱠᱟᱹᱦᱱᱤ ᱜᱟᱛᱟᱣ" (᱑᱙᱘᱗)
ᱮᱢᱟᱱ ᱟᱭᱢᱟ᱾
ᱥᱟᱶᱛᱟ ᱥᱩᱥᱟᱹᱨᱤᱭᱟᱹ
ᱥᱚᱨᱠᱟᱨᱤ ᱟᱨ ᱵᱮᱼᱥᱚᱨᱠᱟᱨᱤ ᱱᱟᱱᱟᱼᱦᱩᱱᱟᱹᱨ ᱥᱟᱶᱛᱟ ᱥᱟᱶ ᱡᱚᱯᱲᱟᱣ ᱛᱟᱦᱮᱸ ᱠᱟᱛᱮ ᱩᱱᱤ ᱫᱚ ᱥᱟᱱᱛᱟᱲ ᱠᱚᱣᱟᱜ ᱠᱟᱹᱣᱰᱤᱭᱟᱹᱨᱤ ᱟᱨ ᱥᱟᱶᱛᱟ ᱩᱛᱱᱟᱹᱣᱟᱜ ᱟᱹᱰᱤ ᱜᱟᱱ ᱠᱟᱹᱢᱤ ᱨᱮ ᱜᱚᱲᱚᱭ ᱮᱢ ᱟᱠᱟᱫᱟ᱾ ᱥᱟᱱᱛᱟᱲᱤ ᱥᱟᱶᱦᱮᱫ ᱮᱠᱟᱰᱮᱢᱤ ᱛᱷᱟᱯᱚᱱ ᱛᱷᱟᱯᱚᱱ ᱨᱮ ᱩᱱᱤᱭᱟᱜ ᱟᱹᱰᱤ ᱢᱟᱨᱟᱝ ᱮᱱᱮᱢ ᱢᱮᱱᱟᱜᱼᱟ᱾ ᱯᱚᱱᱚᱛ ᱥᱚᱨᱠᱟᱨᱟᱜ ᱟᱸᱫᱮ ᱛᱮ ᱩᱱᱤ ᱫᱚ ᱥᱟᱱᱛᱟᱲᱤ ᱤᱱᱴᱟᱨᱢᱤᱰᱤᱭᱮᱴ, ᱵᱤ.ᱮ. ᱟᱨ ᱮᱢ.ᱮ. ᱠᱳᱨᱥ ᱵᱮᱱᱟᱣ ᱨᱮ ᱜᱚᱲᱚᱭ ᱮᱢ ᱟᱠᱟᱫᱟ᱾
ᱢᱟᱹᱱ ᱟᱨ ᱥᱤᱨᱯᱷᱟᱹ
᱑) ᱟᱹᱫᱤᱵᱟᱹᱥᱤ ᱥᱟᱶᱦᱮᱫ ᱟᱨ ᱥᱮᱪᱮᱫ ᱪᱮᱛᱟᱱ ᱠᱟᱹᱢᱤ ᱠᱷᱟᱹᱛᱤᱨ ᱒᱐᱑᱘ ᱥᱮᱨᱢᱟ ᱨᱮ ᱥᱤᱧᱚᱛ ᱨᱮᱱ ᱫᱤᱥᱚᱢ ᱜᱚᱢᱠᱮ ᱴᱷᱮᱱ ᱠᱷᱚᱱ ᱯᱚᱫᱽᱢᱚᱥᱨᱤ ᱢᱟᱹᱱ ᱛᱮᱠᱚ ᱢᱟᱹᱱ ᱟᱠᱟᱫᱮᱭᱟ᱾
᱒) ᱫᱤᱞᱞᱤ ᱨᱮᱭᱟᱜ ᱵᱷᱟᱨᱚᱛᱤᱭᱚ ᱫᱚᱞᱤᱛ ᱥᱟᱦᱤᱛᱭᱚ ᱮᱠᱟᱰᱮᱢᱤ ᱠᱷᱚᱱ ᱑᱙᱙᱓ ᱥᱮᱨᱢᱟ ᱨᱮ "ᱟᱢᱵᱮᱫᱽᱠᱚᱨ ᱯᱷᱮᱞᱚᱥᱤᱯ"᱾
᱓) ᱡᱟᱢᱥᱮᱫᱽᱯᱩᱨ ᱦᱤᱱᱫᱤ ᱥᱟᱶᱦᱮᱫ ᱥᱚᱢᱢᱮᱞᱚᱱ ᱠᱷᱚᱱ ᱑᱙᱙᱓ ᱥᱮᱨᱢᱟ ᱨᱮ "ᱨᱟᱥᱴᱨᱚᱵᱷᱟᱥᱟ ᱥᱤᱨᱯᱷᱟᱹ"᱾
ᱵᱚᱸᱜᱟ ᱛᱟᱞᱟ
᱑᱙ ᱱᱚᱵᱷᱮᱢᱵᱚᱨ ᱒᱐᱒᱐ ᱦᱤᱞᱳᱜ, ᱘᱑ ᱥᱮᱨᱢᱟ ᱩᱢᱮᱨ ᱨᱮ ᱡᱟᱢᱥᱮᱫᱽᱯᱩᱨ, ᱠᱚᱨᱚᱱᱰᱤᱦ ᱨᱮᱭᱟᱜ ᱟᱡᱟᱜ ᱚᱲᱟᱜ ᱨᱮᱜᱮ ᱩᱱᱤ ᱫᱚ ᱨᱩᱣᱟᱹ ᱠᱷᱟᱹᱛᱤᱨ ᱮ ᱵᱚᱸᱜᱟ ᱛᱟᱞᱟ ᱮᱱᱟ᱾ ᱡᱷᱟᱨᱠᱷᱚᱸᱰ ᱥᱚᱨᱠᱟᱨ ᱩᱱᱤᱭᱟᱜ ᱢᱩᱪᱟᱹᱫ ᱵᱤᱫᱟᱹᱭ ᱞᱟᱹᱜᱤᱫ ᱢᱩᱪᱟᱹᱫ ᱨᱟᱡᱽ ᱵᱤᱫᱟᱹᱭ ᱮ ᱩᱪᱷᱟᱹᱱ ᱞᱮᱫᱟ᱾
0 Comments