ᱯᱚᱨᱤᱢᱚᱞ ᱦᱮᱢᱵᱽᱨᱚᱢ || Parimal Hembram

᱑᱙᱕᱗ ᱥᱮᱨᱢᱟ ᱨᱮᱱᱟᱜ ᱑ ᱯᱷᱮᱵᱽᱨᱩᱣᱟᱨᱤ ᱦᱤᱞᱚᱜ ᱥᱟᱸᱠᱟᱨᱤᱭᱟ ᱟᱹᱛᱩ ᱨᱮ ᱢᱤᱫ ᱥᱟᱱᱛᱟᱲ ᱜᱷᱟᱨᱚᱸᱡᱽ ᱨᱮ ᱡᱟᱱᱟᱢ ᱞᱮᱱᱟᱭ᱾ ᱟᱯᱟᱛ ᱧᱩᱛᱩᱢ ᱵᱟᱫᱚᱞ ᱪᱚᱱᱫᱽᱨᱚ ᱦᱮᱢᱵᱽᱨᱚᱢ ᱟᱨ ᱟᱭᱳ ᱫᱚ ᱯᱟᱱᱢᱚᱱᱤ᱾ ᱰᱟᱠ ᱚᱲᱟᱜ - ᱪᱷᱳᱣᱛᱟᱨ, ᱛᱷᱟᱱᱟ - ᱥᱚᱨᱮᱝᱜᱟ, ᱵᱟᱸᱠᱩᱲᱟ ᱦᱚᱱᱚᱛ, ᱯᱚᱪᱷᱤᱢ ᱵᱟᱝᱞᱟ, ᱱᱤᱛᱚᱜ ᱫᱚ ᱠᱚᱞᱠᱟᱛᱟ ᱨᱮᱭᱮ ᱛᱟᱦᱮᱱ ᱠᱟᱱᱟ᱾ ᱩᱱᱤ ᱫᱚ ᱑᱙᱗᱕ ᱥᱮᱨᱢᱟ ᱨᱮ ᱡᱷᱟᱨᱜᱨᱟᱢ ᱨᱮᱱᱟᱜ ᱠᱩᱢᱩᱫᱽ ᱠᱩᱢᱟᱨᱤ ᱤᱱᱥᱴᱤᱪᱩᱥᱚᱱ ᱠᱷᱚᱱ ᱟᱡᱟᱜ ᱦᱟᱭᱭᱟᱨ ᱥᱮᱠᱮᱱᱰᱟᱨᱤ ᱯᱟᱥ ᱠᱮᱫᱼᱟ ᱟᱨ ᱑᱙᱗᱘ ᱥᱟᱞᱮ ᱨᱮ ᱠᱚᱞᱠᱟᱛᱟ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱛᱟᱹᱨᱤ ᱨᱮ ᱦᱟᱣᱲᱟ ᱨᱮᱱᱟᱜ ᱩᱞᱩᱵᱮᱨᱤᱭᱟ ᱠᱚᱞᱮᱡᱽ ᱠᱷᱚᱱ ᱵᱟᱝᱞᱟ ᱯᱟᱹᱨᱥᱤ ᱨᱮ ᱚᱱᱟᱨᱥ ᱟᱢᱮᱴ ᱞᱮᱫᱼᱟ᱾ ᱑᱙᱘᱐ ᱥᱟᱞᱮ ᱨᱮ ᱩᱱᱤ ᱫᱚ ᱠᱚᱞᱠᱟᱛᱟ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱠᱷᱚᱱ ᱵᱟᱝᱞᱟ ᱯᱟᱹᱨᱥᱤ ᱨᱮ ᱮᱢ.ᱮ. ᱮᱭ ᱯᱟᱥ ᱞᱮᱫᱟ᱾

ᱩᱱᱤ ᱫᱚ ᱢᱤᱫ ᱵᱮᱸᱠ ᱨᱮᱭ ᱠᱟᱹᱢᱤ ᱠᱟᱱ ᱛᱟᱦᱮᱸᱫ ᱟᱨ ᱛᱟᱭᱚᱢ ᱛᱮ ᱟᱥᱲᱟ ᱢᱟᱪᱮᱫ ᱞᱮᱠᱟᱛᱮ ᱠᱟᱹᱢᱤ ᱠᱮᱫᱟ᱾ ᱑᱙᱘᱙ ᱥᱟᱞᱮ ᱨᱮ ᱩᱱᱤ ᱫᱚ ᱚᱞ ᱤᱱᱰᱤᱭᱟ ᱨᱮᱰᱤᱭᱳ ᱨᱮ ᱯᱨᱳᱜᱽᱨᱟᱢ ᱮᱠᱡᱤᱠᱮᱴᱤᱵᱷ ᱞᱮᱠᱟᱛᱮᱭ ᱥᱮᱞᱮᱫ ᱞᱮᱱᱟ᱾ ᱟᱨ ᱮᱥᱤᱥᱴᱮᱱᱴ ᱰᱤᱨᱮᱠᱴᱚᱨ (ᱯᱤ) ᱞᱮᱠᱟᱛᱮᱭ ᱒᱐᱑᱗ ᱥᱮᱨᱢᱟ ᱨᱮ ᱡᱤᱨᱟᱹᱣ ᱮ ᱦᱟᱛᱟᱣ ᱞᱮᱫᱟ᱾

ᱩᱱᱤ ᱫᱚ ᱟᱡᱟᱜ ᱡᱟᱱᱟᱢ ᱯᱟᱹᱨᱥᱤ ᱥᱟᱱᱛᱟᱲᱤ ᱛᱮ ᱺ ᱢᱟᱨᱥᱟᱞ ᱦᱮᱢᱵᱽᱨᱚᱢ ᱧᱩᱛᱩᱢ ᱛᱮᱭ ᱚᱞᱚᱜ ᱠᱟᱱ ᱛᱟᱦᱮᱸᱫ᱾ ᱩᱱᱤ ᱫᱚ ᱟᱡᱟᱜ ᱚᱱᱚᱬᱦᱮᱸ ᱠᱚ ᱟᱡ ᱛᱮᱜᱮ ᱵᱟᱝᱞᱟ ᱛᱮᱭ ᱛᱚᱨᱡᱚᱢᱟ ᱟᱠᱟᱫᱟ᱾

ᱩᱱᱤ ᱫᱚ ᱟᱹᱫᱤᱵᱟᱹᱥᱤ ᱟᱥᱚᱠᱟᱭ ᱥᱟᱱᱛᱟᱲ ᱟᱨ ᱥᱟᱱᱛᱟᱲᱤ ᱯᱟᱹᱨᱥᱤ, ᱥᱟᱶᱦᱮᱫ ᱪᱮᱛᱟᱱ ᱟᱹᱰᱤᱜᱟᱱ ᱚᱱᱚᱞ ᱠᱚᱭ ᱚᱞ ᱟᱠᱟᱫᱟ᱾ ᱯᱚᱪᱷᱤᱢ ᱵᱟᱝᱞᱟ ᱨᱮ ᱧᱩᱛᱩᱢᱟᱱ ᱜᱟᱶᱛᱟ ᱠᱚ ᱦᱚᱛᱮᱛᱮ ᱥᱟᱯᱲᱟᱣ ᱦᱮᱞᱢᱮᱞ ᱨᱮ ᱱᱚᱣᱟ ᱥᱟᱛᱟᱢ ᱪᱮᱛᱟᱱ ᱟᱭᱢᱟ ᱵᱷᱟᱥᱚᱱ ᱮ ᱮᱢ ᱟᱠᱟᱫᱟ᱾

᱒᱐᱐᱗ ᱥᱮᱨᱢᱟ ᱨᱮ ᱵᱟᱝᱞᱟ ᱯᱟᱹᱨᱥᱤ ᱛᱮ ᱯᱟᱨᱥᱟᱞ ᱟᱠᱟᱱ ᱟᱡᱟᱜ ᱯᱚᱛᱚᱵ ᱺ ᱥᱟᱱᱛᱟᱞᱤ ᱥᱟᱦᱤᱛᱭᱮᱨ ᱤᱛᱤᱦᱟᱥ᱾ ᱱᱚᱣᱟ ᱥᱟᱶᱛᱮ ᱩᱱᱤ ᱫᱚ ᱵᱟᱸᱜᱽᱞᱟ ᱯᱟᱹᱨᱥᱤ ᱨᱮᱱᱟᱜ ᱟᱹᱰᱤ ᱧᱩᱛᱩᱢᱟᱱ ᱡᱟᱨᱱᱮᱞ/ᱯᱟᱛᱷᱟᱢ ᱨᱮ ᱟᱭᱢᱟ ᱚᱱᱚᱞ ᱮ ᱚᱞ ᱟᱠᱟᱫᱟ᱾ ᱩᱱᱤ ᱫᱚ ᱒᱐᱐᱑ ᱥᱟᱞᱮ ᱨᱮ ᱯᱟᱨᱥᱟᱞ ᱟᱠᱟᱱ ᱡᱷᱟᱨᱠᱷᱚᱸᱰᱮᱨ ᱥᱚᱝᱠᱷᱤᱯᱛᱚ ᱤᱛᱤᱦᱟᱥ  ᱧᱩᱛᱩᱢᱟᱱ ᱵᱟᱝᱞᱟ ᱯᱟᱹᱨᱥᱤ ᱛᱮ ᱡᱷᱟᱨᱠᱷᱚᱸᱰ ᱨᱮᱱᱟᱜ ᱠᱷᱟᱴᱚ ᱱᱟᱜᱟᱢ ᱮ ᱚᱞ ᱟᱠᱟᱫᱟ᱾

ᱯᱚᱨᱤᱢᱚᱞ ᱜᱚᱢᱠᱮ ᱫᱚ ᱛᱩᱞᱟᱹᱡᱚᱠᱷᱟᱭᱤᱡ (critic) ᱦᱚᱸ ᱠᱟᱱᱟᱭ, ᱛᱩᱞᱟᱹᱡᱚᱠᱷᱟ ᱪᱮᱛᱟᱱ ᱚᱱᱚᱞ ᱦᱚᱸᱭ ᱚᱞ ᱟᱠᱟᱫᱟ᱾ ᱩᱱᱤ ᱫᱚ ᱵᱟᱨᱭᱟ ᱜᱟᱢᱟᱢ ᱮ ᱚᱞ ᱟᱠᱟᱫᱟ ᱡᱟᱦᱟᱸ ᱫᱚ ᱥᱟᱱᱛᱟᱲᱤ ᱯᱟᱛᱷᱟᱢ ᱨᱮ ᱪᱷᱟᱯᱟ ᱞᱮᱱᱟ᱾ ᱚᱱᱚᱞᱤᱭᱟᱹ ᱥᱟᱶᱛᱮ ᱩᱱᱤ ᱫᱚ ᱢᱤᱫ ᱚᱵᱷᱤᱱᱚᱭ ᱵᱟᱰᱚᱦᱤ ᱦᱚᱸ ᱠᱟᱱᱟᱭ᱾ ᱩᱱᱤ ᱫᱚ ᱵᱟᱝᱞᱟ ᱟᱨ ᱥᱟᱱᱛᱟᱲᱤ ᱯᱟᱹᱨᱥᱤ ᱛᱮ ᱚᱱᱚᱬᱦᱮᱸ ᱠᱚᱭ ᱜᱟᱵᱟᱱᱟ᱾ ᱩᱱᱤ ᱫᱚ ᱥᱟᱱᱛᱟᱲᱤ ᱨᱮ ᱢᱤᱫ ᱯᱷᱳᱞᱠ ᱛᱷᱤᱭᱮᱴᱚᱨ ᱜᱨᱩᱯ ᱨᱮ ᱢᱤᱫ ᱮᱠᱴᱚᱨ ᱞᱮᱠᱟᱛᱮ ᱥᱮᱞᱮᱫ ᱞᱮᱱᱟᱭ ᱟᱨ ᱥᱟᱱᱛᱟᱲᱤ ᱟᱨ ᱵᱟᱝᱞᱟ ᱨᱮ ᱦᱚᱸᱭ ᱚᱵᱷᱤᱱᱚᱭ ᱟᱠᱟᱫᱟ᱾ ᱥᱟᱱᱛᱟᱲᱤ ᱨᱮ ᱟᱭᱢᱟ ᱨᱮᱰᱤᱭᱳ ᱜᱟᱭᱟᱱ ᱨᱮᱭ ᱠᱟᱹᱢᱤ ᱟᱠᱟᱫᱟ, ᱩᱱᱤ ᱫᱚ ᱥᱴᱮᱡᱽ ᱰᱨᱟᱢᱟ ᱟᱨ ᱥᱤᱱᱮᱢᱟ ᱨᱮ ᱦᱚᱸᱭ ᱠᱟᱹᱢᱤ ᱟᱠᱟᱫᱟ᱾ ᱥᱟᱱᱛᱟᱲᱤ ᱟᱨ ᱵᱟᱝᱞᱟ ᱯᱟᱹᱨᱥᱤ ᱛᱮ ᱟᱭᱢᱟ ᱨᱮᱰᱤᱭᱳ ᱜᱟᱭᱟᱱ ᱠᱚᱭ ᱛᱮᱭᱟᱨ ᱟᱠᱟᱫᱟ᱾ ᱱᱮᱛᱟᱨ ᱫᱚ ᱟᱹᱫᱤᱵᱟᱹᱥᱤ ᱠᱚᱣᱟᱜ ᱠᱟᱹᱨᱤ ᱟᱨ ᱟᱹᱨᱤᱪᱟᱹᱞᱤ (art's and culture) ᱨᱮ ᱠᱟᱹᱢᱤ ᱠᱟᱱᱟᱭ᱾

ᱩᱱᱤ ᱫᱚ ᱯᱚᱪᱷᱤᱢ ᱵᱟᱝᱞᱟ ᱥᱟᱱᱛᱟᱲᱤ ᱥᱟᱦᱤᱛᱭᱚ ᱯᱟᱨᱤᱥᱚᱫᱽ ᱨᱤᱱᱤᱡ ᱯᱟᱨᱥᱮᱛ ᱮ ᱛᱟᱦᱮᱸ ᱠᱟᱱᱟ᱾

ᱪᱷᱟᱯᱟ ᱟᱠᱟᱱ ᱯᱩᱛᱷᱤ ᱠᱚ

• ᱟᱠᱷᱲᱟ (᱑᱙᱘᱕): ᱥᱟᱱᱛᱟᱲᱤ ᱨᱮᱭᱟᱜ ᱢᱤᱫᱴᱟᱝ ᱜᱟᱭᱟᱱ ᱨᱮᱱᱟᱜ ᱥᱟᱢᱴᱟᱣ᱾
• ᱨᱮᱸᱜᱮᱡ (᱑᱙᱘᱖): ᱥᱟᱱᱛᱟᱲᱤ ᱠᱟᱹᱦᱱᱤ ᱯᱚᱛᱚᱵ᱾
• ᱵᱟᱹᱞᱴᱟᱹ-ᱵᱟᱠᱷᱮᱲ (᱑᱙᱘᱗): ᱠᱟᱹᱦᱱᱤ ᱯᱚᱛᱚᱵ᱾
• ᱟᱠᱟᱞ (᱑᱙᱘᱘): ᱚᱱᱚᱬᱦᱮᱸ ᱛᱷᱚᱯᱮ᱾
• ᱥᱤᱵᱤᱞ ᱮᱯᱮᱢ ᱥᱮᱸᱜᱮᱞ ᱡᱤᱣᱤ (᱑᱙᱘᱙): ᱚᱱᱚᱬᱦᱮᱸ ᱯᱩᱛᱷᱤ᱾
• ᱛᱤᱨᱤ-ᱥᱤᱯᱟᱦᱤ: ᱥᱟᱱᱛᱟᱲᱤ ᱜᱟᱭᱟᱱ᱾
• ᱠᱟᱥᱰᱩᱝᱜᱽᱨᱤ: ᱥᱟᱱᱛᱟᱲᱤ ᱜᱟᱭᱟᱱ᱾
• ᱥᱟᱱᱛᱟᱞᱤ ᱥᱟᱦᱤᱛᱭᱮᱨ ᱥᱚᱝᱠᱷᱤᱯᱛᱚ ᱯᱚᱨᱤᱪᱚᱭ (᱑᱙᱙᱕ ᱯᱩᱭᱞᱩ ᱨᱟᱫᱟ ᱟᱨ ᱒᱐᱐᱖ ᱫᱚᱥᱟᱨ ᱨᱟᱫᱟ)
• ᱢᱟᱱᱣᱟ-ᱦᱳ-ᱢᱟᱱᱣᱟ (᱑᱙᱙᱖): ᱦᱩᱰᱤᱧ ᱚᱱᱚᱬᱦᱮᱸ ᱥᱟᱢᱴᱟᱣ᱾
• ᱥᱚᱛᱟᱵᱽᱫᱤᱨ ᱥᱚᱱᱟᱛᱟᱞ ᱥᱟᱢᱯᱨᱳᱫᱟᱭ (᱒᱐᱐᱐)
• ᱨᱮᱰᱤᱭᱳ-ᱜᱟᱭᱟᱱ (᱒000): ᱥᱟᱱᱛᱟᱲᱤ ᱨᱮ ᱨᱮᱰᱤᱭᱳ ᱠᱷᱮᱞᱚᱸᱰ᱾
• ᱡᱷᱟᱨᱠᱷᱚᱸᱰᱮᱨ ᱥᱚᱝᱠᱷᱤᱯᱛᱚ ᱤᱛᱤᱦᱟᱥ (᱒᱐᱐᱑)
• ᱱᱟᱠᱳᱥᱤ-ᱥᱤᱠᱮᱱᱫᱮ (᱒᱐᱐᱒): ᱥᱟᱱᱛᱟᱲᱤ ᱚᱱᱚᱬᱦᱮᱸ ᱠᱚ ᱥᱟᱢᱴᱟᱣ᱾
• ᱡᱤᱣᱚᱱ (᱒᱐᱐᱒) ᱥᱟᱱᱛᱟᱲᱤ ᱠᱷᱚᱱ ᱵᱟᱝᱞᱟ ᱯᱟᱹᱨᱥᱤ ᱛᱮ ᱯᱟᱛᱷᱟᱢ ᱠᱚ ᱛᱚᱨᱡᱚᱢᱟ ᱟᱠᱟᱫᱟ᱾
• ᱥᱟᱱᱛᱟᱞ ᱞᱳᱠ ᱠᱟᱛᱷᱟ (᱒᱐᱐᱒)
• ᱚᱱᱚᱬᱦᱮᱸ ᱡᱷᱚᱛᱚᱢ (᱒᱐᱐᱔): ᱥᱟᱱᱛᱟᱲᱤ ᱯᱟᱹᱨᱥᱤ ᱛᱮ ᱚᱱᱚᱬᱦᱮᱸ ᱠᱚᱨᱮᱱᱟᱜ ᱥᱟᱢᱴᱟᱣ᱾
• ᱥᱟᱶᱛᱟᱞᱫᱮᱨ ᱤᱛᱤᱦᱟᱥ ᱥᱟᱱᱫᱷᱟᱱᱮ (᱒᱐᱐᱕)
• ᱨᱤᱢᱤᱞ (᱒᱐᱐᱗): ᱥᱟᱱᱛᱟᱲᱤ ᱯᱟᱹᱨᱥᱤ ᱛᱮ ᱚᱱᱚᱬᱦᱮ ᱠᱚ ᱥᱟᱯᱲᱟᱣ᱾
• ᱥᱟᱶᱛᱟᱞᱤ ᱥᱟᱦᱤᱛᱭᱮᱨ ᱤᱛᱤᱦᱟᱥ (᱒᱐᱐᱗)
• ᱦᱮᱭ ᱥᱟᱢᱟᱞᱳ (᱒᱐᱐᱙) ᱥᱟᱱᱛᱟᱲᱤ ᱚᱱᱚᱬᱦᱮᱸ ᱵᱟᱝᱞᱟ ᱛᱮᱭ ᱛᱚᱨᱡᱚᱢᱟ ᱞᱮᱫᱟ᱾
• ᱥᱟᱶᱛᱟᱞᱤ ᱵᱷᱟᱥᱟ ᱪᱚᱨᱪᱟ - ᱳ - ᱵᱤᱠᱟᱥᱮᱨ ᱤᱛᱤᱵᱽᱨᱤᱛᱚ (᱒᱐᱑᱐)
• ᱡᱚᱲ ᱡᱮᱞᱮᱧ ᱠᱟᱦᱤᱱᱤ (ᱵᱟᱨᱭᱟ ᱚᱱᱚᱬᱦᱮᱸ ᱨᱮᱱᱟᱜ ᱥᱟᱢᱤᱞᱚᱱ) (᱒᱐᱑᱐)
• ᱟᱠᱷᱲᱟ (ᱥᱟᱱᱛᱟᱲᱤ ᱜᱟᱭᱟᱱ ᱛᱷᱚᱯᱮ) (᱒᱐᱑᱒)
• ᱚᱠᱛᱚ ᱨᱮᱭᱟᱜ ᱫᱚᱞᱤᱞ (ᱥᱟᱱᱛᱟᱲᱤ ᱚᱱᱚᱬᱦᱮᱸ) (᱒᱐᱑᱒)
• ᱥᱚᱝᱵᱤᱫᱷᱟᱱᱤᱠ ᱥᱤᱠᱨᱤᱛᱤᱨ ᱫᱟᱵᱤᱛᱮ ᱥᱟᱶᱛᱟᱞᱤ ᱵᱷᱟᱥᱟ ᱟᱱᱫᱚᱞᱳᱱᱮᱨ ᱤᱛᱤᱦᱟᱥ (᱒᱐᱑᱗)
• ᱟᱫᱤᱵᱟᱥᱤ ᱥᱣᱟᱫᱷᱤᱱᱟᱛᱟ ᱥᱚᱝᱜᱨᱟᱢᱤᱫᱮᱨ ᱠᱚᱛᱷᱟ (᱒᱐᱑᱘)

ᱢᱟᱹᱱ ᱟᱨ ᱥᱤᱨᱯᱷᱟᱹ

• ᱯᱩᱨᱩᱞᱤᱭᱟᱹ ᱥᱟᱱᱛᱟᱞᱤ ᱥᱟᱶᱦᱮᱫ ᱥᱤᱨᱯᱷᱟᱹ - (᱑᱙᱘᱘)
• ᱯᱚᱪᱷᱤᱢ ᱵᱟᱸᱜᱽᱞᱟ ᱥᱚᱨᱠᱟᱨ ᱦᱚᱛᱮᱛᱮ ᱮᱢ ᱟᱠᱟᱱ ᱜᱩᱱᱤᱡᱚᱱ ᱥᱤᱨᱯᱷᱟᱹ - (᱒᱐᱐᱐)
• ᱥᱟᱨ-ᱥᱟᱹᱜᱩᱱ ᱯᱚᱛᱨᱤᱠᱟ ᱠᱚᱢᱤᱴᱤ ᱦᱚᱛᱮ ᱛᱮ ᱮᱢ ᱟᱠᱟᱱ ᱥᱟᱨ-ᱥᱟᱹᱜᱩᱱ ᱥᱤᱨᱯᱷᱟᱹ᱾
• ᱥᱟᱫᱷᱩ ᱨᱟᱢᱪᱟᱸᱫᱽ ᱟᱣᱟᱨᱰ ᱨᱩᱥᱤᱠᱟ ᱢᱟᱱᱰᱣᱟ, ᱩᱛᱚᱨᱯᱟᱨᱟ - ᱒᱐᱐᱘
• ᱨᱚᱱᱚᱛᱚᱨᱤ ᱥᱟᱦᱤᱛᱭᱚ ᱠᱚᱢᱤᱴᱤ, ᱵᱳᱝᱜᱟᱶ ᱦᱚᱛᱮᱛᱮ ᱥᱟᱦᱤᱛᱭᱚ ᱥᱮᱛᱩ ᱥᱤᱨᱯᱷᱟᱹ᱾
• ᱥᱟᱫᱷᱩ ᱨᱟᱢᱪᱟᱸᱫᱽ ᱢᱩᱨᱢᱩ ᱥᱤᱨᱯᱷᱟᱹ (᱒᱐᱑᱒)
• ᱡᱷᱟᱨᱠᱷᱚᱸᱰᱮᱨ ᱥᱚᱝᱠᱷᱤᱯᱛᱚ ᱤᱛᱤᱦᱟᱥ ᱯᱩᱛᱷᱤ ᱞᱟᱹᱜᱤᱫ ᱥᱤᱨᱯᱷᱟᱹ ᱟᱫᱤᱵᱟᱥᱤ ᱡᱩᱣᱟᱹᱱ ᱜᱟᱶᱛᱟ, ᱠᱚᱞᱠᱟᱛᱟ ᱠᱷᱚᱱ᱾
• ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮ ᱮᱱᱮᱢ ᱞᱟᱹᱜᱤᱫ ᱫᱩᱨᱜᱟᱯᱩᱨ ᱰᱟᱭᱳᱥᱤᱥ ᱦᱚᱛᱮᱛᱮ ᱞᱟᱭᱤᱯᱷ ᱴᱟᱭᱤᱢ ᱟᱪᱤᱵᱷᱢᱮᱱᱴ ᱥᱤᱨᱯᱷᱟᱹ (᱒᱐᱐᱖)᱾