ᱡᱟᱱᱟᱢ ᱯᱟᱹᱨᱥᱤ ᱥᱮ ᱟᱭᱳ ᱯᱟᱹᱨᱥᱤ ᱫᱚ ᱪᱮᱫ ᱠᱟᱱᱟ? ᱟᱵᱚ ᱡᱚᱛᱚ ᱦᱚᱲ ᱵᱮᱥ ᱛᱮ ᱵᱚᱱ ᱵᱟᱲᱟᱭᱟ, ᱡᱮᱞᱠᱟ ᱟᱵᱚ ᱱᱚᱝᱠᱟᱱ ᱥᱚᱢᱟᱡᱽ ᱥᱮᱫ ᱵᱚᱱ ᱪᱟᱞᱟᱜ ᱠᱟᱱᱟ ᱡᱟᱦᱟᱸ ᱨᱮ ᱜᱟᱯᱟᱞᱢᱟᱨᱟᱣ ᱫᱚ ᱫᱤᱠᱩ ᱯᱟᱹᱨᱥᱤ (ᱦᱤᱱᱫᱤ, ᱵᱟᱝᱞᱟ, ᱳᱲᱤᱭᱟ) ᱛᱮ ᱦᱩᱭᱩᱜ ᱠᱟᱱᱟ, ᱟᱵᱚ ᱫᱚ ᱟᱵᱚᱣᱟᱜ ᱡᱟᱱᱟᱢ ᱯᱟᱹᱨᱥᱤ ᱠᱷᱚᱱ ᱵᱚᱱ ᱥᱟᱦᱟᱜ ᱠᱟᱱᱟ᱾ ᱜᱤᱫᱽᱨᱟᱹ ᱡᱟᱱᱟᱢ ᱠᱷᱚᱱ ᱯᱩᱭᱞᱩ ᱡᱟᱦᱟ ᱯᱟᱹᱨᱥᱤᱭ ᱪᱮᱫᱚᱜ ᱠᱟᱱᱟ ᱚᱱᱟ ᱫᱚ ᱡᱟᱱᱟᱢ ᱯᱟᱹᱨᱥᱤ ᱠᱚ ᱢᱮᱛᱟᱜᱼᱟ, ᱟᱨ ᱚᱱᱟ ᱠᱷᱟᱹᱛᱤᱨ ᱟᱭᱢᱟ ᱥᱮᱫ ᱛᱮ ᱱᱚᱣᱟ ᱯᱟᱹᱨᱥᱤ ᱫᱚ ᱟᱵᱚᱣᱟᱜ ᱡᱤᱭᱚᱱ ᱨᱮ ᱟᱹᱰᱤ ᱢᱟᱨᱟᱝ ᱮᱱᱮᱢᱮ ᱮᱢᱟᱜ ᱠᱟᱱᱟ᱾
ᱡᱮᱞᱠᱟ ᱥᱟᱱᱛᱟᱲᱤ ᱯᱟᱹᱨᱥᱤ ᱢᱟᱦᱟ ᱥᱮᱴᱮᱨᱚᱜ ᱠᱟᱱᱟ, ᱫᱮᱞᱟ ᱵᱚᱱ ᱥᱚᱱᱛᱚᱨ ᱛᱮᱵᱚᱱ ᱧᱮᱞ ᱵᱩᱡᱷᱟᱹᱣ ᱞᱮᱜᱮ ᱪᱮᱫᱟᱜ ᱡᱚᱛᱚ ᱦᱚᱲ ᱞᱟᱹᱜᱤᱫ ᱡᱟᱱᱟᱢ ᱯᱟᱹᱨᱥᱤ ᱵᱷᱟᱹᱜᱤ ᱛᱮ ᱵᱟᱰᱟᱭ ᱞᱟᱹᱠᱛᱤᱭᱟᱹᱹᱹ
᱑. ᱵᱩᱨᱫᱷᱤ ᱫᱟᱲᱮ ᱩᱛᱱᱟᱹᱣ
ᱠᱷᱚᱫᱽᱨᱚᱱ ᱠᱷᱚᱱ ᱵᱟᱰᱟᱭᱚᱜ ᱠᱟᱱᱟ ᱡᱮ ᱵᱩᱯᱩᱡᱷᱟᱹᱣ ᱫᱟᱲᱮ ᱩᱛᱱᱟᱹᱣ ᱟᱨ ᱵᱩᱨᱫᱷᱤ ᱫᱟᱲᱮ ᱩᱛᱱᱟᱹᱣ ᱫᱚ ᱟᱠᱚᱣᱟᱜ ᱡᱟᱱᱟᱢ ᱯᱟᱹᱨᱥᱤ ᱨᱮ ᱯᱷᱟᱨᱪᱟ ᱛᱮ ᱛᱩᱞᱟᱹ ᱡᱚᱠᱷᱟ ᱛᱮ ᱩᱥᱟᱹᱨᱟ ᱦᱩᱭᱩᱜᱼᱟ᱾ ᱟᱯᱱᱟᱨᱟᱜ ᱡᱟᱱᱟᱢ ᱯᱟᱹᱨᱥᱤ ᱨᱮ ᱥᱮᱪᱮᱫ ᱫᱟᱲᱮ ᱫᱚ ᱟᱯᱱᱨᱟᱜ ᱡᱟᱱᱟᱢ ᱯᱟᱹᱨᱥᱤ ᱪᱷᱟᱰᱟ ᱠᱟᱛᱮ ᱮᱴᱟᱜ ᱯᱟᱹᱨᱥᱤ ᱛᱮ ᱪᱮᱫᱚᱜ ᱠᱷᱚᱱ ᱪᱮᱛᱟᱱ ᱜᱮᱭᱟ᱾
᱒ᱹ ᱞᱟᱠᱪᱟᱨ ᱥᱟᱞᱟᱜ ᱵᱷᱟᱜᱮ ᱡᱚᱯᱲᱟᱣ
ᱯᱟᱹᱨᱥᱤ ᱫᱚ ᱟᱵᱚᱣᱟᱜ ᱞᱟᱠᱪᱟᱨ ᱡᱤᱣᱤᱫ ᱫᱚᱦᱚ ᱨᱮᱭᱟᱜ ᱢᱩᱲᱩᱫ ᱥᱟᱯᱟᱵ ᱠᱟᱱᱟ᱾ ᱢᱤᱫ ᱯᱟᱹᱨᱥᱤ ᱨᱮᱭᱟᱜ ᱮᱴᱟᱜ ᱯᱟᱹᱨᱥᱤ ᱨᱮ ᱥᱚᱡᱷᱮ ᱛᱚᱨᱡᱚᱢᱟ ᱫᱚ ᱚᱱᱟ ᱯᱩᱭᱞᱩ ᱯᱟᱹᱨᱥᱤ ᱞᱮᱠᱟ ᱵᱟᱝ ᱦᱩᱭ ᱫᱟᱲᱮᱭᱟᱜᱼᱟ᱾ ᱚᱱᱟᱛᱮ, ᱞᱟᱠᱪᱟᱨ ᱵᱩᱡᱷᱟᱹᱣ ᱞᱟᱹᱜᱤᱫ ᱥᱚᱨᱮᱥ ᱰᱟᱦᱟᱨ ᱫᱚ ᱦᱩᱭᱩᱜ ᱠᱟᱱᱟ ᱯᱟᱹᱨᱥᱤ ᱵᱩᱡᱷᱟᱹᱣ᱾ ᱡᱟᱱᱟᱢ ᱯᱟᱹᱨᱥᱤ ᱫᱚ ᱟᱵᱚ ᱟᱵᱚᱣᱟᱜ ᱥᱮᱨᱣᱟ, ᱟᱹᱨᱤᱪᱟᱹᱞᱤ ᱜᱚᱱᱚᱝ ᱟᱨ ᱟᱵᱚᱣᱟᱜ ᱨᱮᱦᱮᱫ ᱥᱟᱶ ᱡᱚᱲᱟᱣ ᱛᱟᱦᱮᱱ ᱞᱟᱹᱜᱤᱫ ᱜᱚᱲᱚ ᱮᱢᱟ ᱵᱚᱱᱟ᱾
᱓ᱹ ᱢᱤᱫ ᱫᱚᱥᱟᱨ ᱯᱟᱹᱨᱥᱤ ᱪᱮᱫᱚᱜ
ᱡᱚᱠᱷᱚᱱ ᱢᱤᱫ ᱦᱚᱲ ᱟᱡᱟᱜ ᱡᱟᱱᱟᱢ ᱯᱟᱹᱨᱥᱤ ᱵᱷᱟᱹᱜᱤ ᱛᱮ ᱥᱟᱺᱦᱤᱡ ᱮ ᱵᱟᱰᱟᱭᱟ, ᱩᱱᱤ ᱞᱟᱹᱜᱤᱫ ᱱᱟᱣᱟ ᱯᱟᱹᱨᱥᱤ ᱪᱮᱫᱚᱜ ᱟᱞᱜᱟ ᱜᱮᱭᱟ᱾ ᱡᱩᱫᱤ ᱜᱤᱫᱽᱨᱟᱹ ᱠᱚ ᱠᱟᱹᱴᱤᱡ ᱩᱢᱮᱨ ᱠᱷᱚᱱ ᱟᱠᱚᱣᱟᱜ ᱡᱟᱱᱟᱢ ᱯᱟᱹᱨᱥᱤ ᱛᱮ ᱠᱚ ᱯᱟᱲᱦᱟᱣᱟ, ᱩᱱᱠᱩ ᱴᱷᱮᱱ ᱮᱴᱟᱜ ᱯᱟᱹᱨᱥᱤ ᱨᱮ ᱯᱟᱲᱦᱟᱣ ᱟᱨ ᱚᱞ ᱨᱮᱭᱟᱜ ᱫᱟᱲᱮ ᱵᱟᱹᱲᱛᱤ ᱛᱟᱦᱮᱱᱟ᱾
᱔ ᱵᱮᱯᱟᱨ ᱥᱮᱫ ᱛᱮ ᱞᱟᱵᱷ
ᱛᱮᱦᱮᱧᱟᱜ ᱠᱟᱹᱣᱰᱤ ᱟᱨᱡᱟᱣ ᱡᱩᱜᱽ ᱨᱮ ᱟᱯᱱᱨᱟᱜ ᱡᱟᱱᱟᱢ ᱯᱟᱹᱨᱥᱤ ᱜᱚᱲᱚ ᱛᱮ ᱯᱩᱭᱥᱟᱹ ᱠᱟᱢᱟᱣ ᱨᱮᱭᱟᱜ ᱥᱚᱢᱵᱷᱚᱵᱚᱱᱟ ᱟᱹᱰᱤ ᱢᱟᱨᱟᱝ ᱜᱮᱭᱟ᱾ ᱵᱮᱯᱟᱨ ᱠᱚ ᱫᱚ ᱴᱚᱴᱷᱟᱹᱠᱤᱭᱟᱹ ᱞᱮᱠᱟᱛᱮ ᱪᱟᱞᱟᱜ ᱠᱟᱱᱟ, ᱚᱱᱟ ᱛᱮ ᱡᱟᱱᱟᱢ ᱯᱟᱹᱨᱥᱤ ᱨᱮᱭᱟᱜ ᱢᱚᱦᱚᱛ ᱫᱚ ᱵᱟᱹᱲᱛᱤ ᱵᱟᱲᱦᱟᱣ ᱟᱠᱟᱱᱟ᱾ ᱟᱢ ᱡᱩᱫᱤ ᱵᱮᱨᱮᱫᱤᱭᱟᱹ (ᱩᱫᱽᱭᱟᱢᱤ) ᱦᱩᱭᱩᱜ ᱥᱟᱱᱟᱭᱮᱫ ᱢᱮᱭᱟ ᱛᱚᱵᱮ ᱟᱢ ᱨᱮᱱ ᱴᱚᱴᱷᱟᱠᱤᱭᱟᱹ ᱜᱚᱨᱦᱟᱠ ᱠᱚ ᱥᱟᱶ ᱨᱚᱯᱚᱲ ᱞᱟᱹᱜᱤᱫ ᱟᱢᱟᱜ ᱡᱟᱱᱟᱢ ᱯᱟᱹᱨᱥᱤ ᱵᱟᱰᱟᱭ ᱫᱚ ᱞᱟᱵᱷᱟ ᱟᱱᱟᱜ ᱠᱟᱱ ᱜᱮᱭᱟ᱾
᱕ᱹ ᱜᱚᱨᱚᱵᱽ ᱟᱹᱱᱟᱹᱭᱠᱟᱹᱣ
ᱟᱢᱟᱜ ᱡᱟᱱᱟᱢ ᱯᱟᱹᱨᱥᱤ ᱵᱷᱟᱜᱤ ᱞᱮᱠᱟ ᱵᱟᱰᱟᱭ ᱫᱚ ᱟᱯᱱᱟᱨ ᱥᱚᱯᱨᱚᱛ ᱟᱨᱵᱟᱝ ᱜᱚᱨᱚᱵᱽ ᱨᱮᱭᱟᱜ ᱠᱟᱛᱷᱟ ᱠᱟᱱᱟ᱾ ᱱᱚᱣᱟ ᱫᱚ ᱢᱤᱫ ᱦᱚᱲᱟᱜ ᱟᱯᱱᱟᱨ ᱵᱤᱥᱟᱹᱭ ᱥᱚᱢᱵᱷᱚᱵᱚᱱ ᱟᱨ ᱢᱚᱱᱮ ᱨᱮ ᱡᱟᱜᱽᱣᱟᱨ ᱥᱤᱨᱡᱟᱹᱣ ᱥᱟᱶ ᱥᱟᱶᱛᱮ ᱩᱱᱤᱭᱟᱜ ᱟᱯᱱᱟᱨ ᱟᱹᱨᱤᱪᱟᱹᱞᱤ ᱩᱯᱨᱩᱢ ᱥᱟᱶ ᱦᱚᱸ ᱡᱚᱲᱟᱣ ᱛᱟᱦᱮᱱᱟᱭ᱾
ᱥᱟᱨ ᱠᱟᱛᱷᱟ ᱞᱮᱠᱟᱛᱮ
ᱟᱭᱳ ᱟᱜ ᱯᱟᱹᱨᱥᱤ ᱫᱚ ᱢᱤᱫ ᱦᱚᱲᱟᱜ ᱩᱛᱱᱟᱹᱣ ᱨᱮ ᱟᱹᱰᱤ ᱢᱟᱨᱟᱝ ᱯᱚᱡᱤᱴᱤᱵᱷ ᱮᱥᱮᱨ ᱮ ᱯᱟᱲᱟᱣᱟ; ᱮᱱᱛᱮᱨᱮᱦᱚᱸ, ᱥᱮᱪᱮᱫ ᱨᱮᱭᱟᱜ ᱦᱚᱨᱟ, ᱥᱟᱫᱷᱟᱨᱚᱱ ᱤᱝᱨᱟᱡᱤ ᱟᱨᱵᱟᱝ ᱫᱤᱠᱩ ᱯᱟᱹᱨᱥᱤ, ᱦᱚᱸ ᱜᱚᱜᱚ-ᱵᱟᱵᱟ ᱠᱚ ᱟᱠᱚ ᱨᱮᱱ ᱜᱤᱫᱽᱨᱟᱹ ᱠᱚ ᱫᱚᱥᱟᱨ ᱯᱟᱹᱨᱥᱤ ᱞᱮᱠᱟᱛᱮ ᱨᱚᱯᱚᱲ ᱞᱟᱹᱜᱤᱫ ᱛᱮᱭ ᱩᱥᱟᱥ ᱟᱠᱚᱣᱟ᱾ ᱱᱚᱣᱟ ᱛᱮ ᱜᱤᱫᱽᱨᱟᱹ ᱠᱚᱣᱟᱜ ᱢᱚᱱᱮ ᱨᱮ ᱫᱚᱦᱟ ᱵᱚᱦᱟ ᱦᱩᱭᱩᱜ ᱠᱟᱱᱟ ᱟᱨ ᱚᱱᱟ ᱠᱷᱟᱹᱛᱤᱨ ᱯᱩᱭᱞᱩ ᱟᱨ ᱫᱚᱥᱟᱨ ᱯᱟᱹᱨᱥᱤ ᱵᱟᱰᱟᱭ ᱨᱮ ᱢᱩᱥᱠᱤᱞ ᱦᱩᱭᱩᱜ ᱠᱟᱱᱟ᱾
ᱡᱟᱱᱟᱢ ᱯᱟᱹᱨᱥᱤ ᱫᱚ ᱚᱱᱟ ᱯᱟᱹᱨᱥᱤ ᱠᱟᱱᱟ ᱡᱟᱦᱟᱸ ᱫᱚ ᱜᱤᱫᱽᱨᱟᱹ ᱡᱟᱱᱟᱢ ᱛᱟᱭᱚᱢ ᱟᱸᱡᱚᱢ ᱫᱟᱲᱮᱭᱟᱜᱼᱟᱭ ᱟᱨ ᱟᱵᱚᱣᱟᱜ ᱩᱭᱦᱟᱹᱨ ᱟᱨ ᱵᱤᱪᱟᱹᱨ ᱠᱚ ᱢᱤᱫ ᱴᱷᱟᱹᱣᱠᱟᱹ ᱢᱩᱴᱷᱟᱹᱱ ᱮᱢ ᱞᱟᱹᱜᱤᱫ ᱜᱚᱲᱚ ᱮᱢᱟᱭᱟᱭ᱾
ᱡᱟᱱᱟᱢ ᱯᱟᱹᱨᱥᱤ ᱪᱮᱫᱚᱜ ᱫᱚ ᱮᱴᱟᱜ ᱜᱟᱹᱦᱤᱨ ᱵᱤᱪᱟᱹᱨ ᱦᱩᱱᱟᱹᱨ, ᱫᱚᱥᱟᱨ ᱯᱟᱹᱨᱥᱤ ᱪᱮᱫᱚᱜ ᱟᱨ ᱚᱞᱚᱜ ᱦᱩᱱᱟᱹᱨ ᱠᱚ ᱥᱩᱫᱷᱟᱹᱨ ᱞᱟᱹᱜᱤᱫ ᱦᱚᱸ ᱟᱹᱰᱤ ᱞᱟᱹᱠᱛᱤᱭᱟᱱᱟ᱾ ᱚᱱᱟᱛᱮ ᱟᱵᱚ ᱵᱚᱱ ᱢᱮᱱ ᱫᱟᱲᱮᱭᱟᱜᱼᱟ ᱡᱮ ᱡᱟᱱᱟᱢ ᱯᱟᱹᱨᱥᱤ ᱫᱚ ᱞᱟᱹᱠᱛᱤᱭᱟᱱ ᱪᱮᱫᱚᱜ ᱡᱤᱱᱤᱥ ᱞᱮᱠᱟᱛᱮ ᱵᱮᱵᱷᱟᱨ ᱦᱩᱭ ᱫᱟᱲᱮᱭᱟᱜᱼᱟ᱾
0 Comments