ᱫᱷᱤᱨᱮᱱᱫᱨᱚᱱᱟᱛᱷ ᱵᱟᱥᱠᱮ || Dhirendranath Baskey

 

ᱧᱩᱛᱩᱢᱟᱱ ᱚᱱᱚᱞᱤᱭᱟᱹ, ᱱᱟᱜᱟᱢᱤᱭᱟᱹ, ᱠᱷᱚᱱᱫᱽᱨᱟᱸᱫᱤᱭᱟᱹ, ᱥᱟᱥᱟᱯᱲᱟᱣᱤᱡ ᱟᱨ ᱛᱩᱢᱟᱹᱞᱤᱭᱟᱹ ᱢᱟᱹᱱ ᱫᱷᱤᱨᱮᱱᱫᱨᱚᱱᱟᱛᱷ ᱵᱟᱥᱠᱮ ᱫᱚ ᱑᱙᱓᱐ ᱥᱮᱨᱢᱟ ᱨᱮᱭᱟᱜ ᱑᱔ ᱡᱩᱱ, ᱢᱮᱫᱤᱱᱤᱯᱩᱨ ᱨᱮᱱᱟᱜ ᱵᱷᱤᱢᱯᱩᱨ ᱟᱹᱛᱩ ᱨᱮᱭ ᱡᱟᱱᱟᱢ ᱞᱮᱱᱟ᱾ 

ᱟᱯᱟᱛ ᱧᱩᱛᱩᱢ ᱫᱚ ᱯᱨᱤᱭᱚᱱᱟᱛᱷ ᱵᱟᱥᱠᱮ ᱟᱨ ᱟᱭᱳ ᱫᱚ ᱥᱚᱨᱚᱡᱤᱱᱤ ᱵᱟᱥᱠᱮ᱾

ᱚᱞᱚᱜ ᱯᱟᱲᱦᱟᱜ

ᱟᱹᱛᱩ ᱨᱮᱜᱮ ᱟᱡᱟᱜ ᱮᱛᱚᱦᱚᱵ ᱥᱮᱪᱮᱫ ᱫᱚ ᱮᱦᱚᱵ ᱟᱠᱟᱱᱟ᱾ ᱵᱷᱤᱢᱯᱩᱨ ᱥᱟᱱᱛᱟᱞ ᱦᱟᱭ ᱥᱠᱩᱞ ᱠᱷᱚᱱ ᱢᱮᱴᱨᱤᱠ ᱮ ᱯᱟᱥ ᱞᱮᱫᱟ᱾ ᱚᱱᱟ ᱛᱟᱭᱚᱢ ᱦᱩᱜᱽᱞᱤ ᱦᱚᱱᱚᱛ ᱨᱮᱭᱟᱜ ᱥᱨᱤᱨᱟᱢᱯᱩᱨ ᱠᱚᱞᱮᱡᱽ ᱠᱷᱚᱱ ᱟᱭ.ᱮ. ᱟᱨ ᱵᱤ.ᱮ. ᱮ ᱯᱟᱥ ᱞᱮᱫᱟ᱾ 

ᱠᱟᱹᱢᱤ

ᱢᱟᱪᱮᱫ ᱞᱮᱠᱟ ᱛᱮᱜᱮ ᱫᱷᱤᱨᱮᱱᱫᱨᱚᱱᱟᱛᱷ ᱟᱜ ᱠᱟᱹᱢᱤ ᱡᱤᱭᱚᱱ ᱫᱚ ᱮᱛᱚᱦᱚᱵ ᱟᱠᱟᱱᱟ᱾ ᱑᱙᱕᱖ ᱥᱮᱨᱢᱟ ᱠᱷᱚᱱ ᱯᱚᱪᱷᱤᱢ ᱵᱟᱝᱞᱟ ᱥᱚᱨᱠᱟᱨ 'ᱜᱟᱞᱢᱟᱨᱟᱣ' ᱯᱟᱛᱷᱟᱢ ᱩᱪᱷᱟᱹᱱ ᱮ ᱮᱦᱚᱵ ᱠᱮᱫ ᱠᱷᱟᱱ, ᱫᱷᱤᱨᱮᱱᱫᱨᱚᱱᱟᱛᱷ ᱵᱟᱥᱠᱮ ᱫᱚ ᱚᱱᱟ ᱨᱮᱱ ᱜᱚᱲᱚ ᱥᱟᱥᱟᱯᱲᱟᱣᱤᱡ ᱞᱮᱠᱟᱛᱮᱭ ᱵᱚᱦᱟᱞ ᱮᱱᱟ᱾ ᱱᱚᱣᱟ ᱯᱟᱛᱷᱟᱢ ᱜᱮ ᱛᱟᱭᱚᱢ ᱛᱮ 'ᱯᱚᱪᱷᱤᱢ ᱵᱟᱝᱞᱟ' ᱧᱩᱛᱩᱢ ᱛᱮ ᱯᱟᱨᱥᱟᱞᱚᱜ ᱠᱟᱱ ᱛᱟᱸᱦᱮᱱᱟ᱾ ᱑᱙᱕᱖ ᱠᱷᱚᱱ ᱑᱙᱘᱙, ᱯᱮᱜᱮᱞ ᱯᱮ (᱓᱓) ᱥᱮᱨᱢᱟ ᱱᱚᱣᱟ ᱨᱮᱱ ᱜᱚᱲᱚ ᱥᱟᱥᱟᱯᱲᱟᱣᱤᱡ ᱞᱮᱠᱟᱛᱮ ᱠᱟᱹᱢᱤ ᱛᱟᱭᱚᱢ ᱱᱚᱣᱟ ᱠᱷᱚᱱ ᱡᱤᱨᱟᱹᱣ ᱮ ᱦᱟᱛᱟᱣ ᱠᱮᱫᱟ᱾ 

ᱥᱚᱨᱠᱟᱨᱤ ᱞᱮᱠᱟᱛᱮ ᱠᱟᱹᱢᱤ ᱠᱷᱚᱱ ᱡᱤᱨᱟᱹᱣ ᱦᱟᱛᱟᱣ ᱠᱟᱛᱮ ᱨᱮᱦᱚᱸ ᱩᱱᱤ ᱫᱚ ᱯᱚᱪᱷᱤᱢ ᱵᱟᱝᱞᱟ ᱥᱚᱨᱠᱟᱨᱟᱜ ᱛᱟᱭᱚᱢ ᱟᱠᱟᱱ ᱜᱟᱸᱛᱟᱠ ᱵᱷᱟᱹᱞᱟᱹᱭ ᱵᱤᱵᱷᱟᱜᱽ ᱠᱷᱚᱱ ᱟᱹᱫᱤᱵᱟᱹᱥᱤ ᱩᱛᱷᱱᱟᱹᱣ ᱥᱚᱢᱚᱵᱟᱭ ᱱᱤᱜᱚᱢ ᱨᱮᱠᱚ ᱵᱚᱦᱟᱞ ᱞᱮᱫᱮᱭᱟ᱾ 

ᱱᱚᱣᱟ ᱦᱩᱫᱟᱹ ᱨᱮ ᱛᱟᱸᱦᱮ ᱠᱟᱛᱮ ᱩᱱᱤ ᱫᱚ ᱟᱹᱰᱤᱜᱟᱱ ᱟᱹᱫᱤᱵᱟᱹᱥᱤ ᱵᱷᱟᱹᱞᱟᱹᱭ ᱠᱟᱹᱢᱤ ᱮ ᱠᱟᱹᱢᱤ ᱟᱠᱟᱫᱟ᱾ 

ᱥᱟᱶᱦᱮᱫ ᱨᱮ ᱮᱱᱮᱢ

ᱥᱟᱱᱛᱟᱲᱤ ᱯᱟᱹᱨᱥᱤ ᱼ ᱥᱟᱶᱦᱮᱫ ᱨᱮ ᱫᱷᱤᱨᱮᱱᱫᱨᱚᱱᱟᱛᱷ ᱵᱟᱥᱠᱮ ᱟᱜ ᱮᱱᱮᱢ ᱫᱚ ᱛᱤᱥ ᱜᱮ ᱵᱟᱝ ᱦᱤᱲᱤᱧᱚᱜᱼᱟ᱾ 

"ᱯᱚᱪᱷᱤᱢ ᱵᱟᱝᱞᱟ" ᱯᱟᱛᱷᱟᱢ ᱨᱮᱱ ᱥᱟᱥᱟᱯᱲᱟᱣᱤᱡ ᱞᱮᱠᱟᱛᱮ ᱟᱭᱢᱟ ᱥᱟᱱᱛᱟᱲᱤ ᱠᱟᱹᱦᱱᱤ, ᱚᱱᱚᱬᱦᱮᱸ ᱟᱨ ᱚᱱᱚᱞ ᱠᱚᱸᱭ ᱯᱟᱨᱥᱟᱞ ᱟᱠᱟᱫᱟ᱾ ᱟᱡᱟᱜ ᱩᱫᱽᱜᱟᱹᱣ ᱟᱨ ᱜᱚᱲᱚᱛ ᱛᱮ ᱟᱭᱢᱟ ᱱᱟᱣᱟ ᱱᱟᱣᱟ ᱚᱱᱚᱞᱤᱭᱟᱹ ᱠᱚ ᱫᱟᱣ ᱮ ᱮᱢ ᱟᱠᱟᱫ ᱠᱚᱣᱟ᱾

ᱥᱤᱨᱡᱚᱱ ᱥᱟᱶᱦᱮᱫ ᱥᱟᱶ ᱡᱚᱯᱲᱟᱣ ᱵᱟᱭ ᱛᱟᱸᱦᱮᱠᱟᱱ ᱨᱮᱦᱚᱸ ᱯᱟᱹᱨᱥᱤ ᱼ ᱥᱟᱶᱦᱮᱫ ᱪᱮᱛᱟᱱ ᱮ ᱠᱷᱚᱱᱫᱽᱨᱚᱸᱱ ᱟᱠᱟᱫᱟ᱾ 

ᱱᱟᱜᱟᱢᱤᱭᱟᱹ ᱞᱮᱠᱟ ᱛᱮᱦᱚᱸ ᱫᱷᱤᱨᱮᱱᱫᱨᱚᱱᱟᱛᱷ ᱵᱟᱥᱠᱮ ᱟᱜ ᱩᱯᱨᱩᱢ ᱫᱚ ᱢᱮᱱᱟᱜᱼᱟ᱾ ᱑᱘᱕᱕ ᱨᱮᱭᱟᱜ ᱥᱟᱱᱛᱟᱲ ᱦᱩᱞ ᱨᱮᱱ ᱦᱩᱞᱜᱟᱨᱤᱭᱟᱹ ᱠᱚᱣᱟᱜ ᱠᱟᱛᱷᱟ ᱟᱡᱟᱜ "সাঁওতাল গণ-সংগ্রামের ইতিহাস" (ᱥᱟᱶᱛᱟᱞᱤ ᱜᱚᱱᱚ ᱥᱚᱝᱜᱽᱨᱟᱢᱮᱨ ᱤᱛᱤᱦᱟᱥ) ᱯᱚᱛᱚᱵ ᱨᱮ ᱟᱹᱰᱤ ᱱᱟᱯᱟᱭ ᱮ ᱥᱟᱵ ᱨᱟᱠᱟᱵ ᱟᱠᱟᱫᱟ᱾ 

ᱱᱚᱣᱟ ᱪᱷᱟᱰᱟ ᱠᱟᱛᱮ ᱦᱚᱸ ᱥᱟᱱᱛᱟᱲ ᱥᱟᱶᱛᱟ ᱨᱮᱭᱟᱜ ᱠᱩᱫᱩᱢ, ᱢᱮᱱᱠᱟᱛᱷᱟ, ᱵᱷᱮᱱᱛᱟ ᱠᱟᱛᱷᱟ ᱠᱚ ᱛᱩᱢᱟᱹᱞ ᱡᱟᱣᱨᱟ ᱠᱟᱛᱮ ᱯᱩᱛᱷᱤ ᱞᱮᱠᱟᱛᱮᱭ ᱡᱚᱜᱚᱣ ᱫᱚᱦᱚ ᱟᱠᱟᱫᱟ᱾ ᱟᱡᱟᱜ ᱟᱹᱰᱤᱜᱟᱱ ᱚᱞ "ᱯᱮᱲᱟ ᱦᱚᱲ", "ᱡᱩᱜᱽᱥᱤᱨᱤᱡᱚᱞ", "ᱦᱟᱹᱨᱤᱭᱟᱹᱲ ᱥᱟᱠᱟᱢ" ᱮᱱᱟᱢ ᱥᱟᱱᱛᱟᱲᱤ ᱯᱟᱛᱷᱟᱢ ᱠᱚᱨᱮ ᱯᱟᱨᱥᱟᱞ ᱟᱠᱟᱱᱟ᱾

ᱟᱡᱟᱜ ᱯᱚᱛᱚᱵ ᱠᱚ

• "ᱥᱟᱱᱛᱟᱞᱤ ᱢᱮᱱᱠᱟᱛᱷᱟ ᱟᱨ ᱵᱷᱮᱱᱛᱟ ᱠᱟᱛᱷᱟ" - ᱑᱙᱘᱒
• "ᱠᱩᱫᱩᱢ" - ᱑᱙᱘᱒
• "ᱦᱚᱲ ᱢᱚᱦᱚᱞ ᱨᱮᱭᱟᱜ ᱟᱹᱨᱤ" - ᱑᱙᱘᱘
• "ᱦᱚᱲ ᱥᱚᱢᱟᱡᱽ ᱨᱮᱭᱟᱜ ᱟᱹᱨᱤ ᱟᱨ ᱵᱤᱪᱟᱹᱨ ᱫᱷᱟᱨᱟ" - ᱑᱙᱙᱒
• "ᱠᱟᱨᱟᱢ ᱵᱤᱱᱛᱤ" - ᱑᱙᱙᱓
• "ᱵᱷᱟᱸᱰᱟᱱ ᱵᱤᱱᱛᱤ" - ᱑᱙᱙᱔
• "ᱯᱚᱪᱷᱢ ᱵᱟᱝᱞᱟ ᱟᱨ ᱟᱵᱚᱨᱮᱱ ᱟᱹᱜᱤᱞ ᱵᱤᱨᱟᱹᱫᱟᱹᱞᱤᱠᱚ" - ᱑᱙᱙᱕
• "ᱢᱟᱨᱮ ᱦᱚᱲ ᱠᱟᱹᱦᱱᱤ" - ᱑᱙᱙᱗
• "ᱫᱟᱸᱥᱟᱭ ᱫᱟᱬᱟᱱ ᱨᱮᱭᱟᱜ ᱛᱮᱛᱮᱫ ᱯᱟᱸᱡᱟ" - ᱑᱙᱙᱘
• "ᱥᱟᱱᱛᱟᱲ ᱥᱚᱢᱟᱡᱽ ᱤᱧ ᱠᱩᱞᱤᱭᱮ ᱠᱟᱱᱟ" 
• "ᱦᱚᱲ ᱨᱚᱱ ᱵᱟᱭᱟᱱ ᱟᱹᱨᱤ" - ᱒᱐᱐᱑
• "ᱵᱟᱦᱟ ᱯᱚᱨᱚᱵᱽ ᱟᱨ ᱦᱚᱲ ᱥᱚᱢᱟᱡᱽ" - ᱒᱐᱐᱒
• "ᱦᱚᱲ ᱥᱚᱢᱟᱡᱽ ᱨᱮ ᱵᱚᱸᱜᱟ ᱵᱩᱨᱩ ᱠᱚ" - ᱒᱐᱐᱓
• "ᱦᱚᱲ ᱵᱟᱯᱞᱟ ᱥᱮᱨᱮᱧ ᱯᱩᱛᱷᱤ"

ᱵᱟᱝᱞᱟ ᱯᱟᱹᱨᱥᱤ ᱛᱮ ᱚᱞ ᱛᱚᱯᱚᱵ

• "সাঁওতাল গণ-সংগ্রামের ইতিহাস" (ᱥᱟᱶᱛᱟᱞ ᱜᱚᱱᱚᱼᱥᱚᱝᱜᱨᱟᱢᱮᱨ ᱤᱛᱤᱦᱟᱥ) - ᱑᱙᱗᱖
• "পশ্চিমবঙ্গের আদিবাসী সমাজ" (ᱯᱚᱥᱪᱤᱢ ᱵᱚᱝᱜᱮᱨ ᱟᱫᱤᱵᱟᱥᱤ ᱥᱚᱢᱮᱡᱽ)  - ᱑᱙᱘᱗
• "বঙ্গ সংস্কৃতিতে  প্রাক বৈদিক প্রভাব" (ᱵᱚᱝᱜᱚ ᱥᱚᱸᱥᱠᱨᱤᱛᱤᱛᱮ ᱯᱨᱟᱠ ᱵᱚᱭᱫᱤᱠ ᱥᱚᱢᱟᱡᱽ - ᱑᱙᱙᱒
• "গণ আন্দোলনে সাঁওতাল সমাজ" (ᱜᱚᱱᱚ ᱟᱱᱫᱳᱞᱳᱱᱮ ᱥᱟᱶᱛᱟᱞ ᱥᱚᱢᱟᱡᱽ) - ᱒᱙᱙᱖
• "সাঁওতালি ভাষা ও সাহিত্যের ইতিহাস" (ᱥᱟᱶᱛᱟᱞᱤ ᱵᱷᱟᱥᱟ ᱳ ᱥᱟᱦᱤᱛᱛᱮᱨ ᱤᱛᱤᱦᱟᱥ" - ᱑᱙᱙᱙
• "The Tribals of West Bengal" - ᱯᱚᱥᱪᱤᱢ ᱵᱚᱝᱜᱮᱨ ᱟᱫᱤᱵᱟᱥᱤ ᱥᱚᱢᱮᱡᱽ ᱨᱮᱭᱟᱜ ᱛᱚᱨᱡᱚᱢᱟ) - ᱒᱐᱐᱒
• "বিয়াল্লিসের এর আগস্ট আন্দোলনের সাঁওতাল জনগোষ্ঠী" (ᱵᱤᱭᱟᱞᱞᱤᱥᱮᱨ ᱟᱜᱚᱥᱴ ᱟᱱᱫᱳᱞᱳᱱᱮ ᱥᱟᱶᱛᱟᱞ
• "আদিবাসী সমাজ ও পালা-পার্বণ" (ᱟᱫᱤᱵᱟᱥᱤ ᱥᱚᱢᱮᱡᱽ ᱳ ᱯᱟᱞᱟ ᱯᱟᱨᱵᱚᱱ) 
• "বাংলার লোকসংস্কৃতি ও আদিবাসী সংস্কৃতি" (ᱵᱟᱝᱞᱟ ᱞᱳᱠᱳ ᱥᱟᱸᱥᱠᱨᱤᱛᱤ ᱠᱚ ᱟᱫᱤᱵᱟᱥᱤ ᱥᱚᱸᱥᱠᱨᱤᱛᱤ

ᱟᱡᱟᱜ ᱥᱟᱶᱦᱮᱫ ᱨᱮ ᱮᱱᱮᱢ ᱠᱷᱟᱹᱛᱤᱨ ᱟᱭᱢᱟ ᱢᱟᱹᱱ ᱟᱨ ᱥᱤᱨᱯᱷᱟᱹ ᱮ ᱧᱟᱱ ᱟᱠᱟᱫᱟ᱾ 

• ᱯᱚᱪᱷᱤᱢ ᱵᱟᱝᱞᱟ ᱥᱚᱨᱠᱟᱨ ᱯᱟᱦᱴᱟ ᱥᱮᱫ ᱠᱷᱚᱱ ᱑᱙᱙᱒ ᱥᱮᱨᱢᱟ ᱨᱮ 'ᱜᱩᱱᱤᱡᱚᱱ' ᱢᱟᱹᱱ ᱪᱟᱞ᱾
• ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱜᱟᱶᱛᱟ ᱯᱟᱦᱴᱟ ᱥᱮᱫ ᱠᱷᱚᱱ ᱑᱙᱙᱓ ᱥᱮᱨᱢᱟ ᱨᱮ ᱥᱤᱨᱯᱷᱟᱹ ᱪᱟᱞ᱾
• ᱨᱚᱵᱤᱱᱫᱽᱨᱚ ᱵᱷᱟᱨᱚᱛᱤ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱠᱷᱚᱱ ᱟᱹᱫᱤᱵᱟᱹᱥᱤ ᱠᱷᱚᱱᱫᱽᱨᱚᱸᱫᱤᱭᱟᱹ ᱞᱮᱠᱟᱛᱮ ᱢᱟᱹᱱ ᱪᱟᱞ᱾

ᱢᱟᱹᱱ ᱫᱷᱤᱨᱮᱱᱫᱨᱚᱱᱟᱛᱷ ᱵᱟᱥᱠᱮ ᱫᱚ ᱒᱑ ᱯᱷᱮᱵᱽᱨᱩᱣᱟᱨᱤ ᱒᱐᱑᱔ ᱦᱤᱞᱚᱜ ᱘᱔ ᱥᱮᱨᱢᱟ ᱩᱢᱮᱨ ᱨᱮ ᱠᱚᱞᱠᱟᱛᱟ ᱨᱮᱱᱟᱜ ᱟᱡᱟᱜ ᱵᱟᱥᱟ ᱚᱲᱟᱜ ᱨᱮᱭ ᱵᱚᱸᱜᱟ ᱛᱟᱞᱟ ᱮᱱᱟ᱾