ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱨᱮᱱ ᱧᱩᱢᱟᱱ ᱪᱮᱞᱟ ᱟᱨ ᱚᱱᱚᱬᱦᱤᱭᱟᱹ ᱜᱩᱨᱩᱪᱚᱨᱚᱱ ᱥᱚᱨᱮᱱ ᱟᱜ ᱡᱟᱱᱟᱢ ᱑᱙᱔᱔ ᱥᱮᱨᱢᱟ ᱨᱮᱭᱟᱜ ᱑᱓ ᱡᱩᱱ, ᱳᱰᱤᱥᱟ ᱯᱚᱱᱚᱛ ᱨᱮᱱᱟᱜ ᱢᱚᱭᱩᱨᱵᱷᱚᱸᱡᱽ ᱦᱚᱱᱚᱛ ᱨᱮᱱᱟᱜ ᱨᱟᱭᱨᱚᱝᱯᱩᱨ ᱥᱩᱨ ᱜᱩᱸᱰᱩᱨᱤᱭᱟᱹ ᱟᱹᱛᱩ ᱨᱮ᱾
ᱟᱯᱟᱛ ᱧᱩᱛᱩᱢ ᱨᱚᱛᱚᱱ ᱥᱚᱨᱮᱱ ᱟᱨ ᱟᱭᱳ ᱫᱚ ᱟᱨᱥᱩ ᱥᱚᱨᱮᱱ᱾
ᱥᱮᱪᱮᱫ
ᱜᱩᱨᱩᱪᱚᱨᱚᱱ ᱟᱜ ᱯᱟᱲᱦᱟᱜ ᱡᱤᱭᱚᱱ ᱫᱚ ᱟᱹᱛᱩ ᱨᱮᱭᱟᱜ ᱯᱨᱟᱭᱢᱟᱨᱤ ᱥᱠᱩᱞ ᱠᱷᱚᱱ ᱮᱦᱚᱵ ᱞᱮᱱᱟ᱾ ᱮᱛᱚᱦᱚᱵ ᱥᱮᱪᱮᱫ ᱛᱟᱭᱚᱢ ᱨᱟᱭᱨᱚᱝᱯᱩᱨ ᱦᱟᱭ ᱥᱠᱩᱞ ᱨᱮᱭ ᱵᱷᱩᱨᱛᱤ ᱞᱮᱱᱟ ᱟᱨ ᱑᱙᱖᱒ ᱥᱮᱨᱢᱟ ᱨᱮ ᱱᱚᱸᱰᱮ ᱠᱷᱚᱱ ᱢᱮᱴᱨᱤᱠ ᱮ ᱯᱟᱥ ᱞᱮᱫᱟ᱾ ᱑᱙᱖᱔ ᱥᱮᱨᱢᱟ ᱨᱮ ᱨᱟᱭᱨᱚᱝᱯᱩᱨ ᱠᱚᱞᱮᱡᱽ ᱠᱷᱚᱱ ᱯᱨᱤᱼᱭᱩᱱᱤᱵᱷᱟᱨᱥᱤᱴᱤ ᱠᱳᱨᱥ ᱮ ᱯᱟᱥ ᱞᱮᱫᱟ᱾
ᱚᱱᱟ ᱛᱟᱭᱚᱢ ᱜᱷᱟᱨᱚᱸᱡᱽ ᱨᱮᱭᱟᱜ ᱠᱟᱹᱣᱰᱤ ᱟᱱᱟᱴ ᱠᱷᱟᱹᱛᱤᱨ ᱯᱟᱲᱦᱟᱜ ᱵᱟᱹᱜᱤ ᱦᱩᱭ ᱟᱫᱮᱭᱟ᱾
ᱠᱟᱹᱢᱤ
ᱯᱩᱭᱞᱩ ᱮᱢ.ᱤ. ᱥᱠᱩᱞ ᱨᱮ ᱢᱟᱨᱟᱝ ᱢᱟᱪᱮᱫ ᱞᱮᱠᱟᱛᱮ ᱠᱟᱹᱢᱤᱭ ᱮᱦᱚᱵ ᱞᱮᱫᱟ᱾ ᱱᱚᱣᱟ ᱠᱟᱹᱢᱤ ᱛᱮ ᱢᱚᱱ ᱵᱟᱝ ᱯᱩᱨᱟᱹᱣ ᱞᱮᱱ ᱛᱟᱭ ᱛᱮ ᱢᱟᱪᱮᱫ ᱠᱟᱹᱢᱤ ᱵᱟᱹᱜᱤ ᱠᱟᱛᱮ ᱳᱰᱤᱥᱟ ᱥᱚᱨᱠᱟᱨ ᱟᱜ ᱰᱟᱠ ᱵᱤᱵᱷᱟᱜᱽ ᱨᱮ ᱠᱚᱨᱱᱤᱠ ᱦᱩᱫᱟᱹ ᱨᱮ ᱠᱟᱹᱢᱤᱭ ᱞᱟᱜᱟᱣ ᱮᱱᱟ᱾ ᱛᱟᱭᱚᱢ ᱛᱮ ᱚᱱᱟ ᱦᱚᱸ ᱵᱟᱹᱜᱤ ᱠᱟᱛᱮ ᱵᱤᱡᱽᱞᱤ ᱵᱤᱵᱷᱟᱜᱽ ᱨᱮᱭ ᱵᱚᱞᱚ ᱞᱮᱱᱟ᱾ ᱒᱐᱐᱔ ᱥᱮᱨᱢᱟ ᱨᱮ ᱡᱤᱨᱟᱹᱣ ᱮ ᱦᱟᱛᱟᱣ ᱠᱮᱫᱟ᱾
ᱥᱟᱶᱦᱮᱫ ᱪᱟᱨᱪᱟ
ᱵᱟᱲᱟᱭ ᱟᱠᱟᱱᱟ, ᱯᱟᱹᱴᱷᱩᱣᱟᱹ ᱡᱤᱭᱚᱱ ᱠᱷᱚᱱ ᱜᱮ ᱥᱟᱶᱦᱮᱫ ᱪᱮᱛᱟᱱ ᱨᱮ ᱜᱚᱨᱚᱡᱽ ᱛᱟᱭ ᱛᱟᱸᱦᱮ ᱠᱟᱱᱟ᱾ ᱡᱩᱣᱟᱹᱱ ᱩᱢᱮᱨ ᱨᱮᱜᱮ 'ᱜᱩᱨᱩ ᱜᱚᱢᱠᱮ' ᱟᱜ ᱩᱫᱽᱜᱟᱹᱣ ᱛᱮ ᱟᱡᱟᱜ ᱥᱟᱶᱦᱮᱫ ᱪᱟᱨᱪᱟ ᱛᱚᱨᱟᱣ ᱨᱟᱠᱟᱵ ᱞᱮᱱᱟ᱾ ᱚᱱᱚᱬᱦᱤᱭᱟᱹ ᱜᱩᱨᱩᱪᱚᱨᱚᱱ ᱟᱜ ᱚᱱᱚᱬᱦᱮᱸ ᱨᱮ ᱪᱷᱟᱸᱫᱟ ᱨᱮᱭᱟᱜ ᱵᱮᱵᱷᱟᱨ ᱵᱟᱹᱲᱛᱤ ᱠᱟᱭᱛᱮ ᱧᱮᱞᱚᱜᱼᱟ᱾ ᱥᱟᱶᱛᱟ ᱟᱨ ᱥᱟᱪᱟᱨᱦᱮ ᱛᱟᱞᱟ ᱛᱮ ᱡᱤᱭᱚᱱ ᱨᱮᱭᱟᱜ ᱪᱤᱛᱟᱹᱨ ᱟᱹᱰᱤ ᱱᱟᱯᱟᱭ ᱥᱟᱺᱦᱤᱡ ᱟᱡᱟᱜ ᱚᱱᱚᱬᱦᱮᱸ ᱨᱮᱭ ᱥᱟᱵ ᱨᱟᱠᱟᱵ ᱟᱠᱟᱫᱟ᱾
ᱱᱚᱣᱟ ᱵᱮᱜᱚᱨ ᱦᱚᱸ ᱥᱟᱱᱛᱟᱲ ᱥᱟᱶᱛᱟ, ᱞᱟᱭ ᱞᱟᱠᱪᱟᱨ ᱟᱨ ᱫᱷᱚᱨᱚᱢ ᱵᱟᱵᱚᱛ ᱛᱮ ᱚᱱᱚᱞ ᱮ ᱚᱞ ᱟᱠᱟᱫᱟ᱾ ᱥᱟᱶᱛᱮ ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱟᱜ ᱡᱤᱭᱚᱱᱤ ᱦᱚᱸᱭ ᱚᱞ ᱟᱠᱟᱫᱟ᱾
ᱟᱡᱟᱜ ᱚᱞ ᱠᱚ 'ᱥᱟᱜᱮᱱ ᱥᱟᱠᱟᱢ', 'ᱠᱤᱭᱟᱹ ᱥᱤᱸᱫᱩᱨ' ᱟᱨ 'ᱥᱟᱶᱛᱟ ᱵᱟᱨᱛᱮ' ᱯᱟᱛᱷᱟᱢ ᱠᱚᱨᱮ ᱯᱟᱨᱥᱟᱞ ᱟᱠᱟᱱᱟ᱾
ᱵᱟᱹᱨᱤᱯᱚᱫᱟ ᱠᱷᱚᱱ ᱯᱟᱨᱥᱟᱞᱚᱜ ᱠᱟᱱ 'ᱵᱷᱚᱧᱡᱽ ᱟᱲᱟᱝ' ᱯᱟᱛᱷᱟᱢ ᱨᱮᱱ ᱥᱟᱥᱟᱯᱲᱟᱣᱤᱡ ᱞᱮᱠᱟᱛᱮᱭ ᱦᱚᱸᱭ ᱛᱟᱸᱦᱮ ᱠᱟᱱᱟ᱾
ᱯᱟᱨᱥᱟᱞ ᱟᱠᱟᱱ ᱯᱚᱛᱚᱵ
• "ᱫᱮᱣᱟᱱ ᱢᱟᱰᱟ" (ᱚᱱᱚᱬᱦᱮᱸ) - ᱑᱙᱗᱘
• "ᱪᱟᱹᱭ ᱟᱠᱷᱲᱟ" (ᱚᱱᱚᱬᱦᱮᱸ) - ᱑᱙᱘᱒
ᱥᱤᱨᱯᱷᱟᱹ
ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮ ᱟᱡᱟᱜ ᱮᱱᱮᱢ ᱞᱟᱹᱜᱤᱫ ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱜᱟᱶᱛᱟ ᱯᱟᱦᱴᱟ ᱠᱷᱚᱱ ᱒᱐᱐᱑ ᱥᱮᱨᱢᱟ ᱨᱮ 'ᱥᱟᱹᱫᱷᱩ ᱨᱟᱢᱪᱟᱸᱫᱽ ᱩᱱᱩᱭᱦᱟᱹᱨ ᱥᱤᱨᱯᱷᱟᱹ' ᱠᱚ ᱪᱟᱞ ᱠᱟᱫᱮᱭᱟ᱾
0 Comments