ᱚᱱᱚᱬᱦᱤᱭᱟᱹ ᱦᱚᱨᱚᱯᱨᱚᱥᱟᱫᱽ ᱢᱩᱨᱢᱩ ᱫᱚ ᱥᱟᱱᱛᱟᱲ ᱥᱟᱶᱛᱟ ᱨᱮ ᱢᱤᱫ ᱠᱷᱚᱵᱚᱨ ᱯᱟᱼᱯᱟᱲᱦᱟᱣᱤᱡ ᱞᱮᱠᱟᱛᱮ ᱜᱮᱭ ᱩᱯᱨᱩᱢ ᱟᱠᱟᱱᱟ᱾ ᱩᱱᱤ ᱫᱚ ᱑᱙᱔᱔ ᱥᱮᱨᱢᱟ ᱨᱮᱭᱟᱜ ᱒᱘ ᱡᱩᱱ, ᱩᱱᱚᱠᱛᱚ ᱵᱤᱦᱟᱨ ᱨᱮᱱᱟᱜ ᱥᱤᱝᱵᱷᱩᱢ ᱡᱤᱞᱟ ᱨᱮᱭᱟᱜ ᱫᱷᱚᱞᱵᱷᱩᱢᱜᱚᱲ ᱠᱳᱠᱯᱟᱲᱟ ᱰᱟᱠ ᱚᱲᱟᱜ ᱛᱟᱹᱨᱤ ᱨᱮ ᱢᱮᱱᱟᱜ ᱢᱩᱲᱟᱴᱷᱟᱹᱠᱨᱟᱹ ᱟᱹᱛᱩ ᱨᱮᱭ ᱡᱟᱱᱟᱢ ᱞᱮᱱᱟ (ᱱᱤᱛ ᱡᱷᱟᱨᱠᱷᱚᱸᱰ ᱨᱮᱱᱟᱜ ᱥᱟᱢᱟᱝ ᱥᱤᱝᱵᱷᱩᱢ ᱨᱮ)᱾ ᱟᱯᱟᱛ ᱧᱩᱛᱩᱢ ᱫᱚ ᱯᱷᱚᱠᱤᱨᱪᱚᱱᱫᱽᱨᱚ ᱢᱩᱨᱢᱩ ᱟᱨ ᱟᱭᱳ ᱫᱚ ᱨᱟᱫᱷᱟᱨᱟᱱᱤ ᱾
ᱞᱟᱹᱭ ᱛᱚᱨᱟ ᱜᱟᱱᱚᱜᱼᱟ, ᱟᱡ ᱵᱟᱵᱟ ᱯᱷᱚᱠᱤᱨᱪᱚᱱᱫᱽᱨᱚ ᱢᱩᱨᱢᱩ ᱦᱚᱸ ᱢᱤᱫ ᱧᱩᱛᱩᱢᱟᱱ ᱜᱟᱭᱟᱱ ᱚᱱᱚᱞᱤᱭᱟᱹ ᱮ ᱛᱟᱦᱮᱸ ᱠᱟᱱᱟ᱾
ᱚᱞᱚᱜ ᱯᱟᱲᱦᱟᱜ
ᱦᱚᱨᱚᱯᱨᱚᱥᱟᱫᱽ ᱟᱜ ᱮᱛᱚᱦᱚᱵ ᱥᱮᱪᱮᱫ ᱫᱚ ᱟᱹᱛᱩ ᱥᱠᱩᱞ ᱠᱷᱚᱱ ᱜᱮ ᱦᱩᱭ ᱟᱠᱟᱱᱟ᱾ ᱚᱱᱟ ᱛᱟᱭᱚᱢ ᱜᱷᱟᱴᱥᱤᱞᱟ ᱨᱮᱭᱟᱜ ᱡᱮ.ᱥᱤ. ᱦᱟᱭ ᱥᱠᱩᱞ ᱠᱷᱚᱱ ᱢᱮᱴᱨᱤᱠ ᱮ ᱯᱟᱥ ᱞᱮᱫᱟ᱾ ᱚᱠᱚᱭ ᱠᱚᱫᱚ ᱠᱚ ᱢᱮᱱᱟ, ᱵᱚᱦᱚᱲᱜᱳᱲᱟ ᱦᱟᱭ ᱥᱠᱩᱞ ᱠᱷᱚᱱ ᱢᱮᱴᱨᱤᱠ ᱮ ᱯᱟᱥ ᱟᱠᱟᱫᱟ᱾ ᱢᱮᱴᱨᱤᱠ ᱯᱟᱥ ᱛᱟᱭᱚᱢ ᱡᱟᱢᱥᱮᱫᱽᱯᱩᱨ ᱨᱮ ᱦᱮᱡ ᱠᱟᱛᱮ ᱣᱟᱨᱠᱟᱨᱥ ᱠᱚᱞᱮᱡᱽ ᱨᱮᱭ ᱵᱷᱩᱨᱛᱤ ᱮᱱᱟ᱾ ᱚᱸᱰᱮ ᱠᱷᱚᱱ ᱜᱮ ᱵᱤ.ᱮ. ᱦᱚᱭ ᱯᱟᱥ ᱞᱮᱫᱟ᱾
ᱠᱟᱹᱢᱤ
ᱢᱟᱪᱮᱫ ᱞᱮᱠᱟᱛᱮ ᱜᱮ ᱟᱡᱟᱜ ᱠᱟᱹᱢᱤ ᱡᱤᱭᱚᱱ ᱮᱛᱚᱦᱚᱵ ᱞᱮᱱᱟ᱾ ᱢᱮᱱᱠᱷᱟᱱ ᱚᱠᱟ ᱥᱠᱩᱞ ᱨᱮᱱ ᱢᱟᱪᱮᱫ ᱮ ᱛᱟᱦᱮᱸ ᱠᱟᱱᱟ ᱚᱱᱟ ᱫᱚ ᱵᱟᱝ ᱵᱟᱲᱟᱭ ᱟᱠᱟᱱᱟ᱾
᱑᱕ ᱟᱜᱚᱥᱴ ᱑᱙᱗᱕ ᱥᱮᱨᱢᱟ ᱨᱮ, ᱥᱮᱨᱢᱟ ᱟᱲᱟᱝ (ᱟᱠᱟᱥᱵᱟᱱᱤ) ᱠᱚᱞᱠᱟᱛᱟ ᱨᱮ ᱓᱐ ᱴᱤᱯᱤᱡ ᱨᱮᱭᱟᱜ ᱥᱟᱱᱛᱟᱲᱤ ᱟᱠᱷᱲᱟ ᱪᱟᱹᱞᱩ ᱮᱱ ᱠᱷᱟᱱ ᱱᱚᱣᱟ ᱨᱮᱱ ᱩᱪᱷᱟᱹᱱᱤᱡ (Announcer) ᱞᱮᱠᱟᱛᱮ ᱦᱚᱨᱚᱯᱨᱚᱥᱟᱫᱽ ᱢᱩᱨᱢᱩ ᱮ ᱵᱚᱦᱟᱞ ᱞᱮᱱᱟ᱾ ᱱᱚᱣᱟ ᱥᱮᱨᱢᱟ ᱨᱮᱭᱟᱜ ᱜᱮ ᱓᱐ ᱱᱚᱵᱷᱮᱢᱵᱚᱨ ᱠᱷᱚᱱ ᱢᱚᱬᱮ (᱕) ᱴᱤᱯᱤᱡ ᱨᱮᱭᱟᱜ ᱥᱟᱱᱛᱟᱲᱤ ᱠᱷᱚᱵᱚᱨ ᱩᱪᱷᱟᱹᱱ ᱮᱦᱚᱵ ᱮᱱᱟ᱾ ᱩᱱ ᱚᱠᱛᱚ ᱩᱪᱷᱟᱹᱱᱤᱡ ᱜᱮ ᱠᱷᱚᱵᱚᱨ ᱮ ᱯᱟᱲᱦᱟᱣᱮᱫ ᱛᱟᱦᱮᱸᱱᱟ᱾
ᱛᱟᱭᱚᱢ ᱛᱮ, ᱑᱙᱗᱗ ᱥᱮᱨᱢᱟ ᱠᱷᱚᱱ ᱥᱛᱷᱟᱭᱤ ᱠᱷᱚᱵᱚᱨ ᱯᱟᱼᱯᱟᱲᱦᱟᱣᱤᱡ ᱞᱮᱠᱟᱛᱮ ᱦᱚᱨᱚᱯᱨᱚᱥᱟᱫᱽ ᱢᱩᱨᱢᱩᱭ ᱵᱚᱦᱟᱞ ᱮᱱᱟ᱾ ᱞᱮᱛᱟᱲ ᱵᱟᱨᱜᱮᱞ ᱮᱭᱟᱭ (᱒᱗) ᱥᱮᱨᱢᱟ ᱱᱚᱣᱟ ᱦᱩᱫᱟᱹ ᱨᱮ ᱠᱟᱹᱢᱤ ᱛᱟᱭᱚᱢ, ᱓᱐ ᱡᱩᱱ ᱒᱐᱐᱔ ᱥᱮᱨᱢᱟ ᱨᱮ ᱡᱤᱨᱟᱹᱣ ᱮ ᱦᱟᱛᱟᱣ ᱠᱮᱫᱟ᱾
ᱥᱟᱶᱦᱮᱫ ᱪᱟᱨᱪᱟ
ᱠᱚᱞᱮᱡᱽ ᱨᱮ ᱯᱟᱲᱦᱟᱜ ᱚᱠᱛᱮ ᱥᱟᱶᱦᱮᱫ ᱪᱮᱛᱟᱱ ᱫᱩᱞᱟᱹᱲ ᱵᱟᱹᱲᱛᱤ ᱞᱮᱱ ᱛᱟᱭᱟ᱾ ᱛᱟᱭᱚᱢ "ᱦᱚᱲ ᱥᱚᱢᱵᱟᱫᱽ" ᱨᱮ ᱟᱡᱟᱜ ᱚᱱᱚᱬᱦᱮᱸ ᱪᱷᱟᱯᱟ ᱛᱟᱞᱟ ᱛᱮ ᱩᱱᱤ ᱫᱚ ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮ ᱟᱬᱜᱚ ᱞᱮᱱᱟᱭ᱾ ᱦᱚᱨᱚᱯᱨᱚᱥᱟᱫᱽ ᱟᱜ ᱚᱞᱼᱵᱮᱞ ᱠᱚ ᱟᱡᱟᱜ ᱪᱟᱹᱠᱨᱤ ᱡᱤᱭᱚᱱ ᱨᱮ ᱦᱟᱨᱟᱼᱵᱩᱨᱩ ᱞᱮᱱᱟ᱾ ᱟᱭᱢᱟ ᱚᱱᱚᱬᱦᱮᱸ, ᱠᱟᱹᱦᱱᱤ ᱠᱚᱭ ᱚᱞ ᱟᱠᱟᱫᱟ᱾ ᱟᱡᱟᱜ ᱚᱞ ᱠᱚ ᱦᱚᱲ ᱥᱚᱢᱵᱟᱫᱽ ᱪᱷᱟᱰᱟ ᱠᱟᱛᱮ "ᱯᱚᱪᱷᱤᱢᱵᱟᱝᱞᱟ", "ᱛᱮᱛᱨᱮ", "ᱥᱤᱞᱤ", "ᱨᱤᱢᱤᱞ" ᱮᱢᱟᱱ ᱯᱟᱛᱷᱟᱢ ᱨᱮᱦᱚᱸ ᱪᱷᱟᱯᱟ ᱟᱠᱟᱱᱟ᱾
ᱚᱱᱚᱬᱦᱤᱭᱟᱹ ᱦᱚᱨᱚᱯᱨᱚᱥᱟᱫᱽ ᱢᱩᱨᱢᱩ ᱫᱚ ᱡᱟᱹᱥᱛᱤ ᱠᱟᱭᱛᱮ ᱫᱩᱞᱟᱹᱲ ᱨᱮᱭᱟᱜ ᱠᱟᱛᱷᱟ ᱜᱮᱭ ᱯᱷᱚᱴᱮᱞ ᱨᱟᱠᱟᱵ ᱟᱠᱟᱫᱟ᱾ ᱟᱡᱟᱜ ᱠᱟᱹᱦᱱᱤ ᱨᱮ ᱥᱟᱱᱛᱟᱲ ᱥᱟᱶᱛᱟ ᱨᱮᱭᱟᱜ ᱫᱤᱱᱟᱹᱢ ᱫᱤᱱᱟᱜ ᱪᱤᱛᱟᱹᱨ ᱧᱮᱞ ᱧᱟᱢᱚᱜᱼᱟ᱾
ᱪᱷᱟᱯᱟ ᱟᱠᱟᱱ ᱯᱚᱛᱚᱵ ᱠᱚ
• "ᱥᱤᱵᱤᱞ ᱮᱯᱮᱢ : ᱥᱮᱸᱜᱮᱞ ᱡᱤᱣᱤ" -᱑᱙᱘᱙ (ᱚᱱᱚᱬᱦᱮᱸ ᱯᱩᱛᱷᱤ) [ᱢᱟᱨᱥᱟᱞ ᱦᱮᱢᱵᱽᱨᱚᱢ ᱥᱟᱶ ᱢᱮᱥᱟ ᱠᱟᱛᱮ]
• "ᱡᱤᱭᱟᱹᱲ ᱡᱷᱟᱨᱱᱟ" - ᱑᱙᱙᱑ (ᱚᱱᱚᱬᱦᱮᱸ ᱯᱩᱛᱷᱤ)
• "ᱨᱟᱱ ᱢᱩᱨᱜᱟᱹᱱ" (ᱚᱱᱚᱬᱦᱮᱸ ᱯᱩᱛᱷᱤ) [ᱵᱟᱝ ᱪᱷᱟᱯᱟ ᱟᱠᱟᱱᱟ]
ᱢᱟᱹᱱ
• "ᱡᱤᱭᱟᱹᱲ ᱡᱷᱟᱨᱱᱟ" ᱚᱱᱚᱬᱦᱮᱸ ᱯᱩᱛᱷᱤ ᱞᱟᱹᱜᱤᱫ ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱜᱟᱶᱛᱟ ᱠᱷᱚᱱ ᱑᱙᱙᱑ ᱥᱮᱨᱢᱟ ᱨᱮ "Poet of the Year"᱾
ᱥᱟᱱᱛᱟᱲᱤ ᱥᱟᱶᱦᱮᱫ ᱪᱟᱨᱪᱟ ᱟᱨ ᱠᱷᱚᱵᱚᱨ ᱯᱟᱲᱦᱟᱣ ᱞᱟᱹᱜᱤᱫ ᱡᱷᱟᱨᱠᱷᱚᱸᱰ ᱨᱮᱭᱟᱜ ᱠᱚᱦᱚᱲᱵᱤᱞ 'ᱥᱟᱱᱛᱟᱞᱤ ᱥᱟᱶᱦᱮᱫ ᱢᱟᱰᱮᱨ' ᱠᱷᱚᱱ "ᱜᱩᱨᱩ ᱜᱚᱢᱠᱮ" ᱢᱟᱹᱱ᱾
0 Comments