ᱰᱚᱢᱚᱱ ᱦᱟᱸᱥᱫᱟ || Daman Hansda

 ᱚᱱᱚᱞᱤᱭᱟᱹ ᱟᱨ ᱚᱱᱚᱬᱦᱤᱭᱟᱹ ᱰᱚᱢᱚᱱ ᱦᱟᱸᱥᱫᱟ ᱫᱚ ᱩᱱᱚᱠᱛᱚ ᱵᱤᱦᱟᱨ ᱯᱚᱱᱚᱛ (ᱱᱤᱛ ᱡᱷᱟᱨᱠᱷᱚᱸᱰ) ᱨᱮᱭᱟᱜ ᱥᱟᱢᱟᱝ ᱥᱤᱝᱵᱷᱩᱢ ᱡᱮᱞᱟ ᱨᱮᱭᱟᱜ ᱪᱟᱹᱠᱩᱞᱤᱭᱟᱹ ᱥᱩᱨ ᱵᱟᱨᱮᱰᱤᱦ ᱟᱹᱛᱩ ᱨᱮ ᱑᱙᱓᱐ ᱥᱮᱨᱢᱟ ᱨᱮᱭᱟᱜ ᱑ ᱞᱩ ᱡᱩᱞᱟᱭ ᱨᱮᱭ ᱡᱟᱱᱟᱢ ᱞᱮᱱᱟ᱾ ᱟᱯᱟᱛ ᱧᱩᱛᱩᱢ ᱫᱚ ᱯᱷᱟᱹᱜᱩ ᱦᱟᱸᱥᱫᱟ ᱟᱨ ᱟᱭᱳ ᱫᱚ ᱪᱷᱤᱛᱟ ᱦᱟᱸᱥᱫᱟ ᱾

ᱚᱞᱚᱜ ᱯᱟᱲᱦᱟᱜ

ᱟᱹᱛᱩ ᱥᱠᱩᱞ ᱠᱷᱚᱱ ᱜᱮ ᱟᱡᱟᱜ ᱮᱛᱚᱦᱚᱵ ᱥᱮᱪᱮᱫ ᱫᱚ ᱮᱦᱚᱵ ᱟᱠᱟᱱ ᱛᱟᱭᱟ᱾ ᱚᱱᱟ ᱛᱟᱭᱚᱢ, ᱞᱟᱯᱷᱟᱝ ᱥᱮᱪᱮᱫ ᱦᱟᱢᱮᱴ ᱞᱟᱹᱜᱤᱫ ᱜᱷᱟᱴᱥᱤᱞᱟᱹ ᱦᱟᱭ ᱥᱠᱩᱞ ᱨᱮᱭ ᱵᱷᱩᱨᱛᱤ ᱞᱮᱱᱟ ᱟᱨ ᱚᱸᱰᱮ ᱠᱷᱚᱱ ᱑᱙᱔᱘ ᱥᱮᱨᱢᱟ ᱨᱮ ᱢᱮᱴᱨᱤᱠ ᱮ ᱯᱟᱥ ᱞᱮᱫᱟ᱾ 

ᱠᱟᱹᱢᱤ ᱡᱤᱭᱚᱱ

ᱢᱟᱪᱮᱫ ᱞᱮᱠᱟᱛᱮ ᱜᱮ ᱟᱡᱟᱜ ᱠᱟᱹᱢᱤ ᱡᱤᱭᱚᱱ ᱫᱚ ᱮᱦᱚᱵ ᱞᱮᱱ ᱛᱟᱭᱟ᱾ ᱠᱤᱱᱭᱟᱱᱤ ᱯᱨᱟᱭᱵᱷᱮᱴ ᱥᱠᱩᱞ ᱨᱮᱱ ᱢᱟᱨᱟᱝ ᱢᱟᱪᱮᱫ ᱞᱮᱠᱟᱛᱮ ᱟᱹᱰᱤ ᱫᱤᱱ ᱠᱟᱹᱢᱤ ᱛᱟᱭᱚᱢ ᱵᱚᱲᱚᱰᱤᱠᱟᱱᱯᱩᱨ ᱮᱢ.ᱤ. ᱥᱠᱩᱞ ᱨᱮᱱ ᱢᱟᱨᱟᱝ ᱢᱟᱪᱮᱫ ᱞᱮᱠᱟᱛᱮᱭ ᱵᱚᱦᱟᱞ ᱞᱮᱱᱟ᱾

ᱥᱟᱶᱦᱮᱫ ᱪᱟᱨᱪᱟ

ᱢᱚᱬᱮ ᱜᱮᱞ ᱫᱚᱥᱚᱠ ᱠᱷᱚᱱ ᱜᱮ ᱰᱚᱢᱚᱱ ᱦᱟᱸᱥᱫᱟ ᱫᱚ ᱥᱟᱶᱦᱮᱫ ᱪᱟᱨᱪᱟᱭ ᱮᱛᱚᱦᱚᱵ ᱟᱠᱟᱫᱟ᱾ ᱛᱚᱵᱮ ᱩᱱᱤ ᱫᱚ ᱛᱩᱨᱩᱭ ᱜᱮᱞ ᱫᱚᱥᱚᱠ ᱠᱷᱚᱱ ᱢᱤᱫ ᱧᱩᱛᱩᱢᱟᱱ ᱚᱱᱚᱬᱦᱤᱭᱟᱹ ᱞᱮᱠᱟᱛᱮᱭ ᱩᱯᱨᱩᱢ ᱟᱠᱟᱱᱟ᱾ ᱩᱱᱤ ᱫᱚ 

ᱥᱟᱶᱦᱮᱫ ᱨᱮᱭᱟᱜ ᱥᱟᱱᱟᱢ ᱦᱟᱹᱴᱤᱧ ᱨᱮᱱ ᱯᱟᱹᱨᱩᱠᱷᱤᱭᱟᱹ ᱮ ᱛᱟᱦᱮᱸ ᱠᱟᱱᱟ ᱾ 

ᱟᱹᱰᱤ ᱟᱞᱜᱟ ᱛᱮᱜᱮ ᱟᱡᱟᱜ ᱚᱱᱚᱬᱦᱮᱸ ᱛᱟᱞᱟ ᱛᱮ ᱥᱟᱶᱛᱟ ᱨᱮᱭᱟᱜ ᱠᱟᱛᱷᱟᱭ ᱯᱷᱚᱴᱮᱞ ᱨᱟᱠᱟᱵ ᱟᱠᱟᱫᱟ᱾ ᱥᱟᱶᱛᱟ ᱨᱮᱭᱟᱜ ᱵᱮᱼᱵᱟᱹᱲᱤᱡ ᱠᱚ ᱵᱤᱨᱩᱫᱽ ᱨᱮᱭ ᱦᱩᱞᱥᱟᱹᱭ ᱟᱠᱟᱫᱟ᱾ ᱥᱟᱶᱛᱮ ᱞᱮᱛᱟᱲ ᱞᱟᱦᱟ ᱪᱟᱞᱟᱜ ᱨᱮᱭᱟᱜ ᱢᱟᱱᱛᱟᱲ ᱛᱮ ᱥᱟᱱᱛᱟᱲ ᱥᱟᱶᱛᱟ ᱪᱮᱜᱷᱟᱹᱣ ᱨᱮᱭᱟᱜ ᱮ ᱠᱩᱨᱩᱢᱩᱴᱩ ᱟᱠᱟᱫᱟ᱾

ᱰᱚᱢᱚᱱ ᱦᱟᱸᱥᱫᱟ ᱫᱚ ᱟᱹᱰᱤ ᱫᱤᱱ ᱥᱟᱱᱛᱟᱲ ᱥᱟᱶᱦᱮᱫ ᱥᱟᱶ ᱡᱚᱯᱲᱟᱣ ᱮ ᱛᱟᱦᱮᱸ ᱠᱟᱱ ᱛᱮᱭ ᱵᱩᱡᱷᱟᱹᱣ ᱧᱟᱢ ᱞᱮᱫᱟ, ᱵᱟᱝᱢᱟ ᱮᱠᱷᱮᱱ ᱯᱩᱛᱷᱤ ᱯᱟᱨᱥᱟᱞ ᱛᱮᱫᱚ ᱯᱟᱹᱨᱥᱤᱼᱥᱟᱶᱦᱮᱫ ᱵᱟᱭ ᱩᱛᱷᱱᱟᱹᱣᱚᱜᱼᱟ᱾ ᱟᱜᱟᱢ ᱫᱤᱱ ᱨᱮ ᱱᱟᱣᱟ ᱱᱟᱣᱟ ᱚᱱᱚᱞᱤᱭᱟᱹ ᱠᱚ ᱛᱮᱭᱟᱨ ᱨᱟᱠᱟᱵ ᱨᱮ ᱥᱟᱶᱦᱮᱫ ᱯᱟᱛᱷᱟᱢ ᱨᱮᱭᱟᱜ ᱦᱚᱸ ᱞᱟᱹᱠᱛᱤ ᱢᱮᱱᱟᱜᱼᱟ᱾ ᱱᱚᱣᱟ ᱡᱚᱥ ᱠᱷᱟᱹᱛᱤᱨ ᱛᱮᱜᱮ ᱑᱙᱘᱕ ᱥᱮᱨᱢᱟ ᱠᱷᱚᱱ ᱯᱮᱼᱪᱟᱸᱫᱚᱠᱤᱭᱟᱹ "ᱨᱟᱭᱵᱟᱨ" ᱯᱟᱛᱷᱟᱢ ᱟᱨ ᱑᱙᱘᱗ ᱥᱮᱨᱢᱟ ᱠᱷᱚᱱ ᱪᱟᱸᱫᱚᱠᱤᱭᱟᱹ "ᱩᱢᱩᱞ" ᱯᱟᱛᱷᱟᱢ ᱮ ᱥᱟᱯᱲᱟᱣ ᱞᱮᱫᱟ᱾

ᱚᱞ ᱯᱚᱛᱚᱵ

• "ᱜᱟᱞᱟᱝ ᱵᱟᱦᱟ" (ᱚᱱᱚᱬᱦᱮᱸ) - ᱑᱙᱕᱓

• "ᱜᱟᱞᱟᱝ ᱜᱮᱞᱮ" (ᱚᱱᱚᱬᱦᱮᱸ) - ᱑᱙᱕᱖

• "ᱵᱤᱨ ᱵᱟᱦᱟ" (ᱚᱱᱚᱬᱦᱮᱸ) - ᱑᱙᱗᱓

• "ᱪᱤᱠᱤ ᱪᱤᱱᱦᱟᱹᱣ" (ᱯᱨᱟᱭᱢᱟᱨ) - ᱑᱙᱘᱒

• "ᱟᱛᱳ ᱚᱲᱟᱜ" (ᱜᱟᱢᱟᱢ) - ᱑᱙᱘᱒

• "ᱯᱤᱭᱟᱞᱯᱩᱨ ᱞᱟᱹᱲᱦᱟᱹᱭ" (ᱚᱱᱚᱬᱦᱮᱸ) - ᱑᱙᱘᱓

• "ᱤᱧ ᱫᱚ ᱚᱠᱚᱭ?" - ᱑᱙᱘᱕

• ᱡᱷᱟᱨᱠᱷᱚᱸᱰ ᱨᱮᱭᱟᱜ ᱥᱮᱫᱟᱭ ᱟᱨ ᱱᱮᱵᱮᱛᱟᱨ ᱱᱟᱜᱟᱢ ᱨᱮᱭᱟᱜ ᱦᱩᱰᱤᱧ ᱛᱩᱢᱟᱹᱞ - ᱑᱙᱘᱘

• "ᱨᱚᱢᱡᱷᱚᱢ ᱯᱟᱛᱟ ᱢᱟᱹᱭ " (ᱚᱱᱚᱞ) - ᱑᱙᱙᱑

• "ᱪᱤᱠᱤ ᱪᱷᱟᱸᱫᱟ" (ᱯᱨᱟᱭᱢᱟᱨ) - ᱑᱙᱙᱑

• "ᱥᱤᱫᱚᱼᱠᱟᱹᱱᱦᱩ ᱦᱩᱞ" (ᱱᱟᱜᱟᱢ) - ᱑᱙᱙᱑

ᱥᱟᱶᱦᱮᱫ ᱪᱟᱨᱪᱟ ᱥᱟᱶ ᱥᱟᱶᱛᱮ ᱰᱚᱢᱚᱱ ᱦᱟᱸᱥᱫᱟ ᱫᱚ ᱟᱹᱰᱤ ᱜᱟᱱ ᱥᱟᱶᱛᱟ ᱟᱨ ᱞᱟᱠᱪᱟᱨ ᱩᱛᱷᱱᱟᱹᱣ ᱜᱚᱱᱚᱴᱷᱚᱱ ᱥᱟᱶ ᱡᱚᱯᱲᱟᱣ ᱮ ᱛᱟᱦᱮᱸ ᱠᱟᱱᱟ᱾ 

ᱥᱤᱨᱯᱷᱟᱹ

ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮ ᱟᱡᱟᱜ ᱮᱱᱮᱢ ᱠᱷᱟᱹᱛᱤᱨ ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱜᱟᱶᱛᱟ  ᱠᱷᱚᱱ ᱑᱙᱘᱙ ᱥᱮᱨᱢᱟ ᱨᱮ ᱢᱟᱹᱱ ᱠᱚ ᱪᱟᱞ ᱟᱠᱟᱫᱮᱭᱟ᱾

ᱵᱚᱸᱜᱟ ᱛᱟᱞᱟ

ᱥᱟᱱᱛᱟᱲ ᱥᱟᱶᱦᱮᱫ ᱩᱛᱷᱱᱟᱹᱣ ᱨᱮ ᱡᱤᱣᱤ ᱟᱞᱟᱭ ᱟᱠᱟᱫ ᱱᱩᱭ ᱚᱱᱚᱬᱦᱤᱭᱟᱹ ᱜᱚᱢᱠᱮ ᱫᱚ ᱑᱙᱙᱒ ᱥᱮᱨᱢᱟ ᱨᱮᱭᱟᱜ ᱒᱒ ᱟᱜᱚᱴᱥ ᱦᱤᱞᱚᱜ ᱟᱵᱚ ᱠᱚ ᱵᱟᱹᱜᱤ ᱚᱴᱚ ᱠᱟᱛᱮ ᱵᱚᱸᱜᱟ ᱫᱤᱥᱚᱢ ᱛᱮᱭ ᱪᱟᱞᱟᱣ ᱮᱱᱟ᱾