ᱧᱩᱛᱩᱢᱟᱱ ᱜᱟᱭᱟᱱ ᱚᱱᱚᱞᱤᱭᱟᱹ ᱡᱚᱫᱩᱱᱟᱛᱷ ᱴᱩᱰᱩ ᱫᱚ ᱑᱙᱔᱙ ᱥᱮᱨᱢᱟ ᱨᱮᱭᱟᱜ ᱒᱑ ᱡᱩᱱ, ᱯᱚᱪᱷᱤᱢ ᱢᱮᱫᱤᱱᱤᱯᱩᱨ ᱡᱮᱞᱟ ᱨᱮᱭᱟᱜ ᱜᱳᱣᱟᱞᱛᱳᱲ ᱥᱩᱨ ᱫᱚᱵᱟᱹᱴᱤ ᱟᱹᱛᱩ ᱨᱮᱭᱟᱜ ᱡᱟᱱᱟᱢ ᱞᱮᱱᱟ᱾ ᱟᱯᱟᱛ ᱧᱩᱛᱩᱢ ᱫᱚ ᱵᱳᱭᱫᱚᱱᱟᱛᱷ ᱴᱩᱰᱩ ᱟᱨ ᱟᱭᱳ ᱫᱚ ᱪᱟᱸᱫᱽᱢᱚᱱᱤ ᱴᱩᱰᱩ᱾
ᱥᱮᱪᱮᱫ
ᱡᱚᱫᱩᱱᱟᱛᱷ ᱟᱜ ᱮᱛᱚᱦᱚᱵ ᱥᱮᱪᱮᱫ ᱫᱚ ᱟᱹᱛᱩ ᱥᱩᱨ ᱥᱩᱱᱫᱚᱨᱵᱮᱲᱤᱭᱟ ᱯᱨᱟᱭᱢᱟᱨᱤ ᱥᱠᱩᱞ ᱠᱷᱚᱱ ᱦᱩᱭ ᱞᱮᱱᱟ᱾ ᱚᱱᱟ ᱛᱟᱭᱚᱢ ᱑᱙᱖᱖ ᱥᱮᱨᱢᱟ ᱨᱮ ᱜᱳᱣᱟᱞᱛᱳᱲ ᱦᱟᱭ ᱥᱠᱩᱞ ᱠᱷᱚᱱ ᱦᱟᱭᱟᱨ ᱥᱮᱠᱮᱱᱰᱟᱨᱤ ᱮ ᱯᱟᱥ ᱞᱮᱫᱟ᱾ ᱑᱙᱖᱙ ᱥᱮᱨᱢᱟ ᱨᱮ ᱦᱩᱜᱽᱞᱤ ᱡᱮᱞᱟ ᱨᱮᱭᱟᱜ ᱵᱮᱝᱜᱟᱭ ᱨᱮ ᱢᱮᱱᱟᱜ ᱚᱜᱷᱳᱨ ᱠᱟᱢᱤᱱᱤ ᱯᱨᱚᱠᱟᱥ ᱪᱚᱱᱫᱽᱨᱟ ᱢᱚᱦᱟᱵᱤᱫᱫᱟᱞᱚᱭ ᱠᱷᱚᱱ ᱵᱤ.ᱮ. ᱭ ᱯᱟᱥ ᱞᱮᱫᱟ᱾
ᱠᱟᱹᱢᱤ ᱡᱤᱭᱚᱱ
ᱟᱡᱟᱜ ᱠᱟᱹᱢᱤ ᱡᱤᱭᱚᱱ ᱫᱚ ᱢᱟᱪᱮᱫ ᱞᱮᱠᱟᱛᱮ ᱮᱦᱚᱵ ᱞᱮᱱ ᱛᱟᱭᱟ᱾ ᱑᱙᱖᱙ ᱥᱮᱨᱢᱟ ᱨᱮ ᱢᱮᱫᱤᱱᱤᱯᱩᱨ ᱡᱮᱞᱟ (ᱱᱤᱛ ᱯᱟᱪᱷᱮ ᱢᱮᱫᱤᱱᱤᱯᱩᱨ) ᱨᱮᱭᱟᱜ ᱟᱴᱷᱟᱝᱜᱤ ᱰᱟᱠ ᱚᱲᱟᱜ ᱨᱮᱭᱟᱜ ᱰᱩᱢᱨᱳ ᱯᱨᱟᱭᱢᱟᱨᱤ ᱥᱠᱩᱞ ᱨᱮ ᱢᱟᱪᱮᱫ ᱠᱟᱹᱢᱤ ᱮ ᱮᱦᱚᱵ ᱞᱮᱫᱟ᱾ ᱚᱱᱟ ᱛᱟᱭᱚᱢ ᱑᱙᱗᱐ ᱥᱮᱨᱢᱟ ᱨᱮ ᱡᱟᱞᱵᱮᱴᱤ ᱯᱨᱟᱭᱢᱟᱨᱤ ᱥᱠᱩᱞ ᱨᱮ, ᱑᱙᱗᱒ ᱥᱮᱨᱢᱟ ᱨᱮ ᱦᱩᱜᱽᱞᱤ ᱨᱮᱭᱟᱜ ᱪᱩᱢᱠᱟᱭᱛᱚᱞᱟ ᱯᱨᱟᱭᱢᱟᱨᱤ ᱥᱠᱩᱞ ᱨᱮ ᱟᱨ ᱑᱙᱗᱒ ᱥᱮᱨᱢᱟ ᱨᱮ ᱯᱟᱪᱷᱮ ᱢᱮᱫᱤᱱᱤᱯᱩᱨ ᱨᱮᱭᱟᱜ ᱦᱟᱵᱽᱲᱟ ᱯᱨᱟᱭᱢᱟᱨᱤ ᱥᱠᱩᱞ ᱨᱮᱭ ᱩᱪᱟᱹᱲ ᱞᱮᱱᱟ᱾
᱑᱙᱗᱕ ᱥᱟᱞᱮ ᱨᱮ "ᱥᱮᱨᱢᱟ ᱟᱲᱟᱝ (ᱟᱠᱟᱥᱵᱟᱱᱤ) ᱠᱚᱞᱠᱟᱛᱟ ᱩᱪᱷᱟᱹᱱ ᱛᱟᱞᱢᱟ ᱨᱮ ᱥᱟᱱᱛᱟᱲᱤ ᱟᱠᱷᱲᱟ ᱪᱟᱹᱞᱩ ᱮᱱ ᱠᱷᱟᱱ ᱡᱚᱫᱩᱱᱟᱛᱷ ᱴᱩᱰᱩ ᱫᱚ ᱱᱚᱣᱟ ᱨᱮ ᱥᱟᱥᱟᱯᱲᱟᱣᱤᱡ ᱞᱮᱠᱟᱛᱮᱭ ᱵᱚᱦᱟᱞ ᱮᱱᱟ᱾ ᱱᱚᱣᱟ ᱨᱮ ᱠᱟᱹᱢᱤ ᱚᱠᱛᱮ ᱩᱱᱤ ᱫᱚ ᱥᱟᱱᱛᱟᱲᱤ ᱞᱟᱠᱪᱟᱨ ᱥᱮᱨᱮᱧ ᱠᱚ ᱡᱤᱭᱟᱹᱲ ᱫᱚᱦᱚ ᱨᱮᱭᱟᱜ ᱠᱩᱨᱩᱢᱩᱴᱩ ᱨᱮᱭ ᱪᱷᱩᱴᱟᱹᱣ ᱞᱮᱱᱟ᱾
ᱞᱟᱹᱭ ᱛᱚᱨᱟ ᱜᱟᱱᱚᱜᱼᱟ, ᱑᱙᱗᱗ ᱥᱮᱨᱢᱟ ᱨᱮᱭᱟᱜ ᱒᱐ ᱟᱨ ᱒᱑ ᱢᱟᱹᱦᱤᱛ ᱨᱮ ᱡᱚᱫᱩᱱᱟᱛᱷ ᱴᱩᱰᱩ ᱟᱜ ᱥᱟᱯᱲᱟᱣ ᱛᱮ ᱥᱚᱢᱤᱨ ᱠᱩᱢᱟᱨ ᱢᱩᱨᱢᱩ ᱟᱜ "ᱴᱩᱣᱟᱹᱨ" ᱜᱟᱭᱟᱱ ᱩᱪᱷᱟᱹᱱ ᱞᱮᱱᱟ᱾ ᱱᱚᱣᱟ ᱜᱟᱭᱟᱱ ᱫᱚ ᱵᱷᱟᱨᱚᱛ ᱡᱟᱠᱟᱛ ᱥᱮᱨᱢᱟ ᱟᱲᱟᱝ ᱦᱮᱯᱲᱟᱣ ᱨᱮ ᱮᱴᱟᱜ ᱜᱟᱭᱟᱱ ᱥᱟᱶᱛᱮ ᱯᱩᱭᱞᱩ ᱥᱤᱨᱯᱷᱟᱹ ᱮ ᱦᱟᱢᱮᱴ ᱞᱮᱫᱟ᱾
ᱥᱟᱶᱦᱮᱫ ᱪᱟᱨᱪᱟ
ᱠᱚᱞᱮᱡᱽ ᱡᱤᱭᱚᱱ ᱠᱷᱚᱱ ᱜᱮ ᱡᱚᱫᱩᱱᱟᱛᱷ ᱴᱩᱰᱩ ᱫᱚ ᱥᱟᱱᱛᱟᱲᱤ ᱥᱟᱶᱦᱮᱫ ᱪᱟᱨᱪᱟ ᱮ ᱮᱦᱚᱵ ᱞᱮᱫᱟ᱾ ᱜᱟᱭᱟᱱ ᱥᱮᱫ ᱜᱮ ᱡᱟᱹᱥᱛᱤᱭ ᱞᱤᱸᱰᱩᱨ ᱞᱮᱱᱟ᱾ ᱩᱱᱚᱠᱛᱚ ᱥᱟᱱᱛᱟᱲᱤ ᱜᱟᱭᱟᱱ ᱨᱮᱭᱟᱜ ᱟᱱᱟᱴ ᱧᱮᱞ ᱠᱟᱛᱮ ᱜᱟᱭᱟᱱ ᱚᱞ ᱮ ᱪᱷᱩᱴᱟᱹᱣ ᱞᱮᱱᱟ᱾
᱑᱙᱗᱗ ᱥᱮᱨᱢᱟ ᱨᱮ ᱠᱚᱞᱠᱟᱛᱟ ᱨᱮ ᱪᱟᱹᱠᱨᱤ ᱞᱟᱹᱜᱤᱫ ᱠᱚ ᱦᱮᱡ ᱟᱠᱟᱱ ᱥᱟᱱᱛᱟᱲ "ᱠᱷᱮᱨᱣᱟᱞ ᱚᱯᱮᱨᱟ ᱠᱳᱞᱠᱟᱛᱟ" ᱠᱚ ᱛᱷᱟᱯᱚᱱ ᱞᱮᱫᱟ, ᱱᱚᱣᱟ ᱨᱮᱦᱚᱸ ᱡᱚᱫᱩᱱᱟᱛᱷ ᱴᱩᱰᱩ ᱟᱜ ᱟᱹᱰᱤ ᱢᱟᱨᱟᱝ ᱮᱱᱮᱢ ᱢᱮᱱᱟᱜᱼᱟ᱾
᱑᱙᱗᱘ ᱥᱮᱨᱢᱟ ᱨᱮ ᱟᱡᱟᱜ "ᱥᱟᱨᱡᱚᱢ ᱜᱤᱨᱟᱹ" ᱜᱟᱭᱟᱱ ᱛᱮᱛᱨᱮ ᱯᱟᱛᱷᱟᱢ ᱨᱮ ᱯᱟᱨᱥᱟᱞ ᱞᱮᱱᱟ᱾
ᱡᱚᱫᱩᱱᱟᱛᱷ ᱫᱚ ᱥᱟᱶᱛᱟ, ᱱᱟᱜᱟᱢ, ᱫᱤᱥᱚᱢ ᱫᱩᱞᱟᱹᱲ ᱮᱢᱟᱱ ᱥᱟᱛᱟᱢ ᱪᱮᱛᱟᱱ ᱟᱭᱢᱟ ᱜᱟᱭᱟᱱ ᱟᱨ ᱨᱮᱰᱤᱭᱳ ᱜᱟᱭᱟᱱ ᱦᱚᱸᱭ ᱚᱞ ᱟᱠᱟᱫᱟ᱾ ᱨᱮᱰᱤᱭᱳ ᱜᱟᱭᱟᱱ ᱥᱟᱯᱲᱟᱣ ᱥᱟᱶᱛᱮ ᱚᱱᱟᱨᱮ ᱚᱵᱷᱤᱱᱚᱭ ᱦᱚᱸᱭ ᱚᱵᱷᱤᱱᱚᱭ ᱟᱠᱟᱫᱟ᱾
ᱚᱞ ᱯᱚᱛᱚᱵ ᱠᱚ
• "ᱚᱞ ᱛᱟᱢ" ᱟᱨ "ᱯᱟᱹᱨᱥᱤ ᱛᱟᱢ" ᱥᱟᱱᱛᱟᱲᱤ ᱯᱨᱟᱭᱢᱟᱨᱤ ᱞᱟᱹᱜᱤᱫ ᱾
• "ᱨᱤᱸᱫᱤ ᱢᱟᱹᱭ ᱞᱚᱫᱚᱢ ᱵᱟᱹᱵᱩ ᱛᱟᱹᱠᱤᱱᱟᱜ ᱠᱟᱛᱷᱟ" - ᱑᱙᱗᱙ (ᱜᱟᱭᱟᱱ)
• ᱱᱟᱵᱟᱞᱚᱠ ᱥᱤᱠᱟᱹᱨᱤᱭᱟᱹ" - ᱑᱙᱘᱐ (ᱜᱟᱭᱟᱱ)
• "ᱤᱝᱨᱮᱡᱤ ᱨᱮᱱ ᱥᱟᱱᱛᱟᱲ ᱜᱩᱨᱩ" - ᱑᱙᱙᱒
• "ᱞᱚᱼᱵᱤᱨ" - ᱒᱐᱐᱕ (ᱜᱟᱭᱟᱱ)
• "ᱠᱷᱮᱨᱣᱟᱲ ᱥᱟᱶᱛᱟ "
• "ᱥᱩᱛᱟᱹᱱ ᱰᱟᱺᱰᱤ"
• "ᱥᱤᱠᱟᱹᱨᱤᱭᱟᱹ "
• "ᱫᱷᱤᱨᱤ ᱵᱚᱸᱜᱟ"
• "ᱥᱤᱨᱤᱡᱟᱞᱟ"
ᱮᱢᱟᱱ᱾
ᱢᱟᱹᱱ
• ᱑᱙᱗᱗ ᱨᱮ "ᱴᱩᱣᱟᱹᱨ" ᱜᱟᱭᱟᱱ ᱥᱟᱯᱲᱟᱣ ᱞᱟᱹᱜᱤᱫ ᱥᱚᱨᱮᱥ ᱥᱟᱥᱟᱯᱲᱟᱣᱤᱡ ᱟᱜ ᱥᱤᱨᱯᱷᱟᱹ᱾
• ᱒᱐᱐᱑ ᱥᱮᱨᱢᱟ ᱨᱮ ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱜᱟᱶᱛᱟ ᱠᱷᱚᱱ 'ᱜᱩᱨᱩ ᱜᱚᱢᱠᱮ ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱩᱱᱩᱭᱦᱟᱹᱨ ᱥᱤᱨᱯᱷᱟᱹ'᱾
ᱵᱚᱸᱜᱟ ᱛᱟᱞᱟ
᱒᱐᱑᱘ ᱨᱮᱭᱟᱜ ᱥᱮᱯᱴᱮᱢᱵᱚᱨ ᱒᱕ ᱨᱮ ᱱᱩᱭ ᱞᱟᱥᱮᱨ ᱦᱟᱛᱟᱝ ᱚᱱᱚᱞᱤᱭᱟᱹ ᱟᱵᱚᱠᱚ ᱵᱟᱹᱜᱤ ᱠᱟᱛᱮ ᱵᱚᱸᱜᱟ ᱫᱤᱥᱚᱢ ᱛᱮᱭ ᱪᱟᱞᱟᱣ ᱮᱱᱟ᱾ ᱱᱤᱛ ᱡᱚᱫᱩᱱᱟᱛᱷ ᱴᱩᱰᱩ ᱜᱚᱢᱠᱮ ᱟᱵᱚ ᱠᱚ ᱛᱟᱞᱟ ᱨᱮ ᱵᱟᱹᱱᱩᱜ ᱨᱮᱦᱚᱸ ᱟᱡᱟᱜ ᱚᱞ ᱠᱚ ᱛᱟᱞᱟ ᱛᱮᱜᱮ ᱟᱵᱚ ᱠᱚ ᱛᱟᱞᱟ ᱨᱮ ᱡᱤᱭᱟᱹᱲ ᱢᱮᱱᱟᱭᱟ᱾
0 Comments