ᱥᱟᱱᱛᱟᱲ ᱫᱚ ᱵᱮᱜᱚᱨ ᱥᱟᱹᱜᱟᱹᱭ ᱛᱮ ᱵᱟᱠᱚ ᱦᱚᱯᱚᱦᱚᱜᱼᱟ᱾
ᱦᱚᱲ ᱡᱟᱦᱟᱸ ᱥᱟᱹᱜᱟᱹᱭ ᱥᱤᱠᱲᱤ ᱛᱮᱠᱚ ᱛᱚᱯᱚᱞᱟᱜᱼᱟ, ᱚᱱᱟ ᱥᱟᱹᱜᱟᱹᱭ ᱨᱮᱭᱟᱜ ᱛᱤᱡ ᱡᱟᱞᱚᱢ ᱜᱮ ᱥᱟᱹᱜᱟᱹᱭ ᱥᱤᱠᱲᱤ ᱠᱚ ᱢᱮᱛᱟᱜᱼᱟ᱾
ᱱᱚᱣᱟ ᱥᱟᱹᱜᱟᱹᱭ ᱥᱤᱠᱲᱤ ᱫᱚ ᱯᱩᱱ ᱞᱮᱠᱟᱱᱟᱜ ᱢᱮᱱᱟᱜᱼᱟ᱾ ᱡᱮᱞᱮᱠᱟ -
- ᱡᱟᱱᱟᱢ ᱥᱟᱹᱜᱟᱹᱭ
- ᱵᱟᱯᱞᱟ ᱥᱟᱹᱜᱟᱹᱭ
- ᱯᱷᱩᱞ ᱥᱟᱹᱜᱟᱹᱭ ᱟᱨ
- ᱫᱤᱥᱚᱢ ᱥᱟᱹᱜᱟᱹᱭ
ᱱᱚᱸᱰᱮ ᱫᱚ ᱡᱟᱱᱟᱢ ᱥᱟᱹᱜᱟᱹᱭ ᱤᱫᱤ ᱠᱟᱛᱮ ᱚᱞ ᱦᱩᱭ ᱟᱠᱟᱱᱟ᱾
᱑) ᱡᱟᱱᱟᱢ ᱥᱟᱹᱜᱟᱹᱭ
ᱢᱤᱫ ᱢᱟᱹᱱᱢᱤ ᱡᱟᱱᱟᱢ ᱛᱚᱨᱟ ᱜᱮ ᱚᱲᱟᱜ ᱦᱚᱲ, ᱟᱛᱳ ᱦᱚᱲ ᱟᱨ ᱯᱮᱲᱟ ᱥᱟᱶ ᱡᱟᱦᱟᱸ ᱥᱟᱹᱜᱟᱹᱭᱛᱮᱭ ᱛᱚᱯᱚᱞᱚᱜᱼᱟ, ᱚᱱᱟ ᱜᱮ ᱡᱟᱱᱟᱢ ᱥᱟᱹᱜᱟᱹᱭ ᱠᱚ ᱢᱮᱛᱟᱜᱼᱟ᱾
ᱱᱚᱣᱟ ᱥᱟᱹᱜᱟᱹᱭ ᱨᱮᱭᱟᱜ ᱵᱟᱨᱭᱟ ᱯᱟᱦᱴᱟ ᱢᱮᱱᱟᱜᱼᱟ᱾
ᱚ) ᱟᱯᱟ ᱯᱟᱦᱴᱟ ᱟᱨ ᱟ) ᱟᱭᱳ ᱯᱟᱦᱴᱟ ᱾
ᱚ) ᱟᱯᱟ ᱯᱟᱦᱴᱟ
ᱢᱤᱫᱴᱟᱝ ᱜᱤᱫᱽᱨᱟᱹ ᱫᱚ ᱯᱩᱭᱞᱩ ᱟᱯᱟ ᱯᱟᱦᱴᱟ ᱨᱮᱱ ᱦᱚᱲᱜᱮᱭ ᱧᱟᱢ ᱠᱚᱣᱟ᱾
📌 ᱟᱯᱟᱛ ᱟᱨ ᱦᱚᱯᱚᱱᱟᱜ ᱥᱟᱹᱜᱟᱹᱭ ᱫᱚ ᱟᱯᱟᱦᱚᱱ (ᱟᱯᱟᱛ ᱟᱹᱲᱟᱹ ᱫᱚ ᱟᱹᱰᱤ ᱜᱟᱱ ᱴᱚᱴᱷᱟ ᱨᱮ ᱵᱟᱵᱟ, ᱵᱟ, ᱟᱯᱟ ᱮᱢᱟᱱ ᱦᱚᱵᱚ ᱢᱮᱱ ᱜᱮᱭᱟ)᱾
ᱱᱚᱝᱠᱟ ᱜᱮ
📌 ᱮᱸᱜᱟᱛ ᱟᱨ ᱦᱚᱯᱚᱱᱟᱜ ᱥᱟᱹᱜᱟᱹᱭ ᱫᱚ ᱮᱸᱜᱟᱦᱚᱱ (ᱮᱸᱜᱟᱛ ᱟᱹᱲᱟᱹ ᱫᱚ ᱟᱭᱳ, ᱜᱚᱜᱚ, ᱜᱚ ᱮᱢᱟᱱ ᱦᱚᱵᱚ ᱢᱮᱱ ᱜᱮᱭᱟ)᱾
📌 ᱵᱟᱵᱟᱭᱤᱡ ᱵᱟᱵᱟ ᱫᱚ ᱜᱚᱲᱚᱢᱵᱟ (ᱫᱟᱹᱫᱩ, ᱵᱟᱵᱟ ᱟᱯᱟᱛ, ᱮᱢᱟᱱ)᱾
📌 ᱵᱟᱵᱟ ᱨᱮᱱ ᱟᱭᱳ ᱫᱚ ᱵᱟᱵᱟ ᱟᱭᱳ (ᱵᱩᱰᱤ, ᱵᱩᱰᱤ ᱜᱚ, ᱮᱢᱟᱱ)
📌 ᱜᱚᱲᱚᱢᱵᱟ ᱟᱨ ᱵᱟᱵᱟ ᱟᱭᱳ ᱨᱮᱱ ᱟᱯᱟᱛ ᱫᱚ ᱫᱟᱫᱟ ᱦᱟᱲᱟᱢ᱾
📌 ᱜᱚᱲᱚᱢᱵᱟ ᱟᱨ ᱵᱟᱵᱟ ᱟᱭᱳ ᱨᱮᱱ ᱟᱭᱳ ᱫᱚ ᱫᱤᱫᱤ ᱵᱩᱰᱦᱤ᱾
📌📌 ᱢᱤᱫ ᱞᱟᱡ ᱨᱮᱱ ᱦᱚᱯᱚᱱ ᱫᱚ ᱵᱚᱭᱦᱟ ᱠᱚ ᱢᱮᱛᱟᱜ ᱠᱚᱣᱟ ᱾
📌 ᱵᱟᱵᱟᱭᱤᱡ ᱢᱟᱨᱟᱝ ᱵᱚᱭᱦᱟ ᱫᱚ ᱢᱟᱨᱟᱝᱵᱟ ᱾
ᱱᱚᱝᱠᱟ ᱜᱮ
📌 ᱛᱟᱞᱟᱭᱤᱡ ᱫᱚ ᱛᱟᱞᱟᱵᱟ, ᱥᱟᱡᱚᱭᱤᱡ ᱫᱚ ᱥᱟᱡᱚᱵᱟ, ᱢᱟᱡᱚᱭᱤᱡ ᱫᱚ ᱢᱟᱡᱚᱵᱟ, ᱥᱟᱺᱡᱽᱞᱟᱹᱭᱤᱡ ᱫᱚ ᱥᱟᱺᱡᱽᱞᱟᱹᱵᱟ, ᱢᱟᱺᱡᱽᱞᱟᱹᱭᱤᱡ ᱫᱚ ᱢᱟᱺᱡᱽᱞᱟᱹᱵᱟ, ᱦᱩᱰᱤᱧᱤᱡ ᱫᱚ ᱦᱩᱰᱤᱧᱵᱟ/ᱦᱚᱯᱚᱱᱵᱟ᱾
📌 ᱢᱟᱨᱟᱝᱵᱟ ᱨᱤᱱᱤᱡ ᱫᱚ ᱢᱟᱨᱟᱝᱜᱚ/ᱢᱟᱨᱟᱝ ᱟᱭᱳ᱾
ᱱᱚᱝᱠᱟ ᱜᱮ
📌 ᱛᱟᱞᱟᱜᱚ, ᱥᱟᱡᱚᱜᱚ, ᱢᱟᱡᱚᱜᱚ, ᱥᱟᱺᱡᱽᱞᱟᱹᱜᱚ, ᱢᱟᱺᱡᱽᱞᱟᱹᱜᱚ, ᱦᱩᱰᱤᱧᱜᱚ/ᱦᱚᱱᱚᱱᱜᱚ᱾
📌 ᱵᱟᱵᱟ ᱨᱮᱱ ᱢᱤᱥᱨᱟ ᱫᱚ ᱦᱟᱛᱚᱢ ᱾
📌 ᱦᱟᱛᱚᱢ ᱡᱟᱶᱟᱭ ᱫᱚ ᱠᱩᱢᱟᱹᱝ ᱾
📌 ᱟᱢ ᱨᱮᱱ ᱞᱟᱹᱴᱩ ᱠᱚᱲᱟ ᱵᱚᱭᱦᱟ ᱫᱚ ᱫᱟᱫᱟ᱾
📌 ᱞᱟᱹᱴᱩ ᱠᱩᱲᱤ ᱵᱚᱭᱦᱟ ᱫᱚ ᱫᱟᱹᱭ (ᱫᱤᱫᱤ)᱾
📌 ᱦᱩᱰᱤᱧ ᱠᱚᱲᱟ ᱵᱚᱭᱦᱟ ᱫᱚ 'ᱵᱚᱠᱚ' (ᱵᱚᱠᱚᱧ)᱾
📌 ᱦᱩᱰᱤᱧ ᱠᱩᱲᱤ ᱵᱚᱭᱦᱟ ᱫᱚ ᱢᱤᱥᱨᱟ᱾
📌 ᱫᱟᱫᱟ ᱵᱟᱹᱦᱩ ᱫᱚ ᱦᱤᱞᱤ ᱾
📌 ᱫᱤᱫᱤ ᱡᱟᱶᱟᱭ ᱫᱚ ᱛᱮᱧᱟᱝ ᱾
📌 ᱵᱚᱠᱚ ᱵᱟᱹᱦᱩ ᱫᱚ ᱵᱚᱠᱚᱵᱟᱹᱦᱩ ᱾
📌 ᱢᱤᱥᱨᱟ ᱨᱮᱱ ᱡᱟᱶᱟᱭ ᱫᱚ ᱢᱤᱥᱨᱟ ᱡᱟᱶᱟᱭ᱾
📌 ᱟᱢ ᱨᱮᱱ ᱡᱩᱨᱤ ᱫᱚ ᱵᱟᱹᱦᱩ (ᱠᱚᱲᱟ ᱠᱷᱟᱱ ᱫᱚ) / ᱡᱟᱶᱟᱭ (ᱠᱩᱲᱤ ᱠᱷᱟᱱ ᱫᱚ)᱾
📌 ᱟᱢ ᱨᱮᱱ ᱠᱚᱲᱟ ᱜᱤᱫᱽᱨᱟᱹ ᱫᱚ ᱵᱟᱹᱵᱩ ᱾
📌 ᱟᱢ ᱨᱮᱱ ᱠᱩᱲᱤ ᱜᱤᱫᱽᱨᱟᱹ ᱫᱚ ᱵᱤᱴᱤ ᱾
📌 ᱵᱟᱹᱵᱩ ᱨᱮᱱ ᱵᱟᱹᱦᱩ ᱫᱚ ᱠᱤᱢᱤᱱ ᱾
📌 ᱵᱤᱴᱤ ᱨᱮᱱ ᱡᱟᱶᱟᱭ ᱫᱚ ᱡᱟᱶᱟᱭ ᱜᱚᱝᱠᱮ ᱾
📌 ᱵᱟᱹᱵᱩ ᱨᱮᱱ ᱠᱚᱲᱟ ᱜᱤᱫᱽᱨᱟᱹ ᱫᱚ ᱜᱚᱲᱚᱢ ᱠᱚᱲᱟ᱾
📌 ᱵᱟᱹᱵᱩ ᱨᱮᱱ ᱠᱩᱲᱤ ᱜᱤᱫᱽᱨᱟᱹ ᱫᱚ ᱜᱚᱲᱚᱢ ᱠᱩᱲᱤ ᱾
📌 ᱜᱚᱲᱚᱢ ᱠᱚᱲᱟ ᱵᱟᱹᱦᱩ ᱫᱚ ᱜᱚᱲᱚᱢ ᱵᱟᱹᱦᱩ ᱾
📌 ᱜᱚᱲᱚᱢ ᱠᱩᱲᱤ ᱡᱟᱶᱟᱭ ᱫᱚ ᱜᱚᱲᱚᱢ ᱡᱟᱶᱟᱭ ᱾
0 Comments